She’riy lahzalar

2022-09-01 09:27:27 MUSTAQILLIK DEKLARATSIYASI

Yana kuz kelmoqda.
Daryolar tindi.
Shildir-shildir oqdi pokiza suvlar.
Urgut bog‘lariga sukunat qo‘ndi,
Xazonlarni sekin shamollar quvlar.

Ota elim, endi sevingin, shodlan,
Istiqloling kelib chertdi darvozang.
Olis manzillarga shu tongda otlan,
Yo‘qolib ketmagay endi ovozang...

Nega quvonmaysan, toshmaysan jo‘shib,
Axir, mustaqillik keldi o‘lkangga?!
O‘ris amaldori yelkangdan tushib,
O‘z amaldoring... mindi yelkangga.

Nechun baxtdan yayrab, shod yashamaysan,
Nechun boshing egik, o‘zing ovvora?!
Endi sen Moskovga pul tashimaysan,
Endi sen ... Toshkentga tashiysan pora.

Sen yaydoq dalangda ishlagin kuyib,
Paxtangni hokimga topshiru quvon –
Poytaxt zavodlari turibdi quyib,
Ko‘ksingga shaqirlab taqarsan unvon!

Hasrating ko‘p – ichda, lek zo‘r – savlating,
Shod bo‘l, deb men o‘zim bo‘lolmasman shod.
Mana, ozod bo‘ldi buyuk davlating...
Bechora xalqing ham bo‘lsaydi ozod.

1990-yil, 20-iyun.
— Karim BAHRIYEV

Qora qalam - adabiyot haqida! Ochish/sharhlash

2022-08-31 20:00:13 * * *

Bolalarni qattiqqo‘llik bilan tarbiyalab bo‘lmaydi, ular qattiqqo‘llikda tutib turiladi.

A.Gayger

@sheriylahzalar Ochish/sharhlash

2022-08-31 15:17:58 #sevimli

☆ ☆ ☆

Сенга келиш нима?
Кетишдай осон.
Сенга йўқотишлар — топишдай бир гап.
Сен дунёни кўрмай яшайсан мудом,
Яшайсан дарахтдай ҳис қилиб, илғаб.

Қалбингда фожелар зумда учади,
Янги ғуссаларни қучасан шодон.
Бебахтлигинг бахтдай сендан кечади —
Алъомон,
Ўзингдан, жоним, алъомон!

Сени тўфонларнинг узи асрасин,
Сендан йироқ қочсин қисмат дудлари.
Йўлингга аямай қутлар ташласин,
Қўли очиқ келсин умринг ҳутларин.

Сенга кетиш нима?
Хайр-хўш... Тамом...
Мен ҳам омон қолай —
Бир нажот бергин.
Нима у бошимга отганинг?
Осмон...
Тўхта! Олиб кетма пойимдан ерни...

Усмон Азим

@sheriylahzalar Ochish/sharhlash

2022-08-31 13:37:19 ☆ ☆ ☆

Мендан кетиш жуда ҳам осон,
Йиғламайман, таъна қилмайман.
Қуласа-да бошимга осмон
Ҳеч қаршилик, пана қилмайман.

Мендан кетиш жуда ҳам осон,
Чорламасман, эслатмам ўзим.
Гарчи сен деб берадирман жон,
Лек демасман: қолгин, азизим!

Мендан кетиш жуда ҳам осон,
Ўрганганман бу кетишларга.
Юрагимда турса-да тўзон,
Хайрлашгум қилмасдан зарда.

Мендан кетиш жуда ҳам осон,
Ташлаб кетган битта сен эмас.
Ич-ичимга тўлгандир хазон
Сен баҳорсан, кўрилмадим мос.

Мендан кетиш жуда ҳам осон,
Гарчи сенсиз дўнгум сояга.
Руҳим сенга талпинар сарсон,
Лек вужудим вазмин қоядай.

Кечир, мудом севганим учун,
Кечмаслигим учун ҳеч қачон.
Сенда айб йўқ, сўнди у учқун,
Энди... мендан кетишинг осон...

Ситорабону

2022.30.08.

@sheriylahzalar Ochish/sharhlash

2022-08-30 10:22:20 Усмон Азим
Алишер Сабрий

☆ ☆ ☆

Ногоҳ салқин келди август сўнгида,
Ёмғир ёғиб ўтди бугун эрталаб.
Эрталаб сабрнинг кўзи ўнгида
Мен сенинг исмингни айтдим эркалаб.

Ногаҳон ўзгариш этдими таъсир,
Ё салқин хотиранг етди – билмадим.
Кўнглимни эрталаб этмадим таҳрир ―
Эркалаб исмингни айтдим. Йиғладим.

Тушундим ― тақдирнинг ишин юритган
Беюрак ройишлар ҳақлидир, ҳақли.
Ўйладим: Албатта, мени унутган!
Албатта, бахтлидир! Албатта, бахтли!

Асли бу мунг нечун? Тақдир ҳал бўлган.
Умрдан неча кун қолди? Билмадим.
Сенсиз ўлмоғимга қисматим кўнган...
Барибир йиғладим.

@sheriylahzalar Ochish/sharhlash

2022-08-30 07:23:18 ОМОНГУЛ

Хонамга шаҳт билан киради дўстим,
Дейди: Ишқ тугади! Энди тамом йўл!
Вокзалга чиқайлик,
Сессия битди,
Омонгул кетади бугун, Омонгул!

Эргашиб жўнаймиз бесўз, бетанбеҳ,
Вокзалга етамиз… Ҳаёт — мунглиғ най.
Бир юз саксонинчи —
«Тошкент — Душанбе»
Поезди турибди жўнамоққа шай.

Топамиз, еттинчи вагон — бул,
Дераза чўмибдир ипак зиёга.
Битта даричадан ўша Омонгул
Сокин виқор билан боқар дунёга.
Омонгул кетади, Омонгул.

Бу ширин ҳаётнинг алами аччиқ,
Сўзлар эзғилайди ёмон дилимни:
«Дўстим, унинг билан орамиз очиқ;
Фақат сўнг бор кўрай Омонгулимни!»

Беомон экан-ку, кўзинг, Омонгул,
Исминг-ку ватанда оздир, Омонгул,
Ёмонгул экансан, ўзинг Омонгул,
Исмингга уйланса арзир Омонгул.

Бошқа не ҳам дердим нафасим ростлаб?!
Дўстимнинг сўзларин, фарёдки, бесўз.
Бўғилиб, ҳаллослаб-ҳаллослаб
Такрорлаб кетади телба паровоз:
Омонгул кетади, Омонгул.
Омонгул кетади, Омонгул!

Ерга дод дейинми ёки осмонга,
Руҳни ёмон яраладинг, Омонгул, —
Муҳаббат ҳурмати, дўстим томонга
Бир бор қарамадинг, Омонгул!

Менинг ҳам кўксимда бир омон гул бор,
Исми ўзга унинг, аммо аён — гул.
Тиканларинг билан бағримда мангу
Омон бўл, омон кул, омон гул!

Бу ёғи жимжитлик,
Додлар юраклар.
Юраклар устидан поездлар кечар.
Дўстимнинг сўзларин шум ғилдираклар
Ҳижжалаб борадир
Қумқўрғонгача:
Омонгул ке-тади, Омонгул,
Омонгул ке-тади, Омонгул.
Омонгул ке-е-тади, Омонгул.

Мирзо Кенжабек

@sheriylahzalar Ochish/sharhlash

2022-08-28 20:01:37 * * *

AYTILMAYDIGAN SHE'R

Tushun,
Senga bormay deyman,
Uzatmay deyman bu qo'llarimni...
Burib ketay deyman,
Senga eltuvchi yo'llarimni...
Xalal bermay deyman,
Qo'zg'atmay deyman.
Biroq sog'inch ko'rsatar kuchin,
Hislarni xazonday to'zg'itmay deyman,
Har kuni o'zimga o'qiyman hukm:
Bugun unga eslatma o'zingni,
Suratidan uz ko'zingni,
Ammo yurak...
Simillar faqat...
Havoga uchirar so'zimni...
Tong otar,
Tongotar.
Havoni simirib,
Tuyganday bo'laman bo'ylaring.
Ko'zimdan uyquni oladi
O'ylaring.
"Bugun maktub yozma!
Telbalanma, aqldan ozma!"
O'qiyman g'ururdan ma'ruza.
Ichikkan ko'zlarim xatingni
O'qiydi: yuz berar mo'jiza!
Bu ne xat,
Bu ne had,
Bu ne dard...
Ko'zlarimda gullaydi chaman!
Yuragimda chalinar chiltor...
Tushun,
Har kuni ko'zimni ochaman
"Salom, yaxshisanmi, Sitor?"
degan jumlani o'qimoq uchun...

Sitorabonu

@sheriylahzalar Ochish/sharhlash

2022-08-27 13:50:57 #tahlil_va_talqin

Atrofimizda yuz berayotgan voqealarga befarq qarab bo‘lmaydi!

Социолог, олима аёл Дилсора Фозилова ёзмоқда:

"Платформани билимсиз, фикрсиз муллаларга бериб қуйдингиз. Аёлга босим кучайиб кетди. Уни кийимидан тортиб, қиладиган ҳар бир ҳаракати кеча-кундуз муллаларнинг таҳлилида бўлди. Улар оғиз кўпиртириб тасвирлаётган жаннати аёл бўлиш имконсиз бўлиб қолди жамиятда. Чунки шундоқ ҳам борини бериб яшаётган эди Ўзбек аёли.

Очиқдан-очиқ эрни қиролга, хотинни чўрига тенг дедилар. Аёлни уриб, жисмонан азоб бериш жоиз дедилар. Аёлларнинг энг зўри умуман гапирмайдигани дедилар. Аёлнинг эри урган жойи дўззахда куймайди дедилар. Сиз индамадингиз! Энди бу муллалар аёлга қуйган стандартларга тушолмай битта-битта бўғизланаяпти улар. Яна айб ўзларида уларни, чунки муллалар айтган аёл бўла олмаяптилар. Қонунлар эса аёллар учун ишламайди, чунки қонунчилар ҳам муллалардан сабоқ олдилар. Чунки эркаклар қонунларни айланиб ўтадилар аёллар эса ўтолмайдилар.

Сиз давлат тепасида турган раҳбар жаноблар, хатоларингизни кўраяпсизми? Олдин чаласавод муллаларингизни йиғиштиринг. Кейин зўравонларингизга қарши кучли қонунлар ва уларнинг ижросини мустаҳкамланг. Аёл ҳам инсон! У бирор томонлама бирортангиздан кам эмас!" - дейди Дилсора Фозилова.

@sheriylahzalar Ochish/sharhlash

2022-08-27 07:23:48 "Professor Douelning boshi" - boshlarning qalb og'riqlari haqida

Hozir hayotimizda oddiy buyumga aylangan elektron jihozlar hali mavjud boʻlmagan zamonlarda xuddi ularga oʻxshash narsalar ilmiy-fantastik badiiy asarlarda mavjud edi. Qaysidir maʼnoda kashfiyotchi va olimlarning koʻplab gʻoyalari qissa, romanlardan olinganiga ishonaman.

Batafsil o'qish:

https://telegra.ph/Professor-Dning-boshi-08-22

Qora qalam - adabiyot haqida! Ochish/sharhlash

2022-08-26 20:43:25 Sitorabonu

***
Koʻzlaringda koʻzlarimni koʻrgim kelar,
Yuragingdan dardlaringni tergim kelar,
Dunyosiga etagimni silkib kelib,
Bir sen bilan hayot uyim qurgim kelar...
Falak uzra ruhim titrab devonavor,
Yuragingga koʻzlaringdan kirib borsam.
Kirib borsam, koʻrib borsam, nurab devor,
Oʻshal qalbni gumonlardan qoʻrib borsam...
Soʻroqlasam, lablaringdan soʻroqlasam,
Oʻtgan yillar hasratini, sogʻinchini...
Ismim aytsang, jonim chiqib ketmasmikin?
Yechib boʻlgach bu taqdirning bogʻichini.
Qalbga oʻrab kirib borsam koʻzlaringdan,
Yurak yonsa, tilak yonsa, soʻngak yonsa...
Boshimni hech ajratmasam tizlaringdan,
Butun olam muhabbatdan mast, toʻlgʻonsa..
Koʻzlaringga ana shunday choʻkib ketsam,
Oʻlayotib qabogʻingdan oʻpib ketsam…

@sheriylahzalar Ochish/sharhlash