БОМДОДНИНГ ҚАЗОСИДА “АССОЛАТУ ХОЙРУМ МИНАН НАВМ” ЖУМЛАСИ АЙТИЛ | ШАЙХ САБОКЛАРИ

БОМДОДНИНГ ҚАЗОСИДА “АССОЛАТУ ХОЙРУМ МИНАН НАВМ” ЖУМЛАСИ АЙТИЛАДИМИ?
#намоз

814-САВОЛ: Қазо бўлган Бомдодни ўқишдан олдин айтиладиган азонда “Ассолату хойрум минан навм” жумласи айтиладими?

ЖАВОБ: Бисмиллаҳир Роҳманир Роҳим.
Шариатимизда, “Қазо адо кабидир” деган қоида бор. Яъни, ўз вақтида ўқилган намоз қандай ўқилса, қазо намози ҳам шундай ўқилади. Шу қоидага биноан, ўз вақтида ўқиладиган Бомдод намозининг азонига “Ассолату хойрум минан навм” жумласи қўшилганидек, қазо бўлган Бомдоднинг азонига ҳам бу жумла қўшилади.

“Ал-Баҳрур роиқ” китобида бундай дейилган:

يؤذن ويقيم للقضاء كالاداء

яъни: “Қазо намозига адо (ўз вақтида ўқилаётган намоз) каби азон ва иқомат такбири айтилади”.

Шундай экан, Бомдоднинг қазосини ўқиш учун азон айтилганда, азонга “Ассолату хойрум минан навм” жумласи қўшиб айтилади. “Ассолату хойрум минан навм” – намоз уйқудан яхши, деган маънони англатади. Валлоҳу аълам.

Ўзбекистон мусулмонлари идораси
фатво ҳайъати.

АЛБАТТА ЯҚИНЛАРИНГИЗГА ҲАМ ТАРҚАТИНГ!!!



@shayx_saboqlarii