«ШАРҚ ЮЛДУЗИ» журнали

2022-08-31 14:43:07 БАЙРАМ МУБОРАК!

Ассалому алайкум, азиз юртдошлар!

Мана жонажон ва бетакрор Ватанимизнинг Мустақилликка эришганига ўттиз бир йил тўлди. Мустақиллик туфайли мамлакатимиз тараққиёти янги босқичга қадам қўйди. Янги Ўзбекистон бўйлаб кўплаб ижобий ўзгаришлар амалга оширилди.

Барчангизни энг улуғ, энг азиз байрамимиз – Мустақиллик куни билан самимий муборакбод этамиз! Илоҳим, юртимиз тинч, осмонимиз мусаффо, кекса-ю ёш барча юртдошларимиз омон бўлишсин! Мустақиллигимиз, бахт-у қувончимиз абадий бўлсин!

«ШАРҚ ЮЛДУЗИ» журнали жамоаси Ochish/sharhlash

2022-08-31 13:45:54 #Наср (3-сон/2020)
Луқмон БЎРИХОН

ЧЎЛДАН КЕЛГАН ТАШВИШ

Ширинанинг юз-кўзлари тўла табассум, мамнуният. Гўёки, аҳли Оврўпони қойил қолдириб келган эри эмас, айнан ўзгинаси, гўёки, эри энтикиб кутаётган мукофотни у аллақачон қўлга киритиб,сандиққа тиққан. Тоғни уриб талқон қилгудек бир кайфиятда дуррачасини қия-қия қўндириб, гулдор халатининг енгларини шимариб юрибди. Қадду басти тўлагина бўлса-да, саъй-ҳаракатлари дадил ва чаққон. Батафсил...

Телеграм каналга уланиш:
"Шарқ Юлдузи" журнали Ochish/sharhlash

2022-08-31 12:55:32 #Назм (3-сон/2020)
Нодир ЖОНУЗОҚ

Пишиқчилик

Ҳаёт – гулбоғ,
Шу чаманда чечак сочдик,
гул очдик,
Жонимизга чанг солгувчи
Печакка ҳам дил очдик.
Қирқ йилда ғарқ пишар эмиш
Хом сут эмган ғўр банда,
Мевамизни элга бердик...
Тамшаниб, қўл чўзганда –
Болта бошли, арра тишли
Касларга ҳам улашдик...

Телеграм каналга уланиш:
"Шарқ Юлдузи" журнали Ochish/sharhlash

2022-08-30 14:24:35 #Назм (2-сон/2022)
Турсун АЛИ

ЁШЛИГИМНИ ЭСЛАБ
Бир маҳаллар босган изимдан
Ўт чақнарди, мисоли чақмоқ.
Шўх кучугим чиқмас измимдан,
Қир-далалар кезардик қувноқ.
Яқин эди осмон сакрасам,
Бошим тегар эди беозор.
Ёшлигим ҳам энди мен билсам,
Қайтмас тўлқин экан исёнкор.

Телеграм каналга уланиш:
"Шарқ Юлдузи" журнали Ochish/sharhlash

2022-08-30 12:06:23 #Наср (3-сон/2020)
Назар Эшонқул

ТАҚИҚ МЕВАСИ
Икки новелладан иборат романдан парча

Бу мубталолик қисмати эди.
Малакни фақат узоқдан кўрар, унинг яқинига ҳам йўлолмас, унга бир сўз айтолмас, лекин уни кўрмасдан туролмас, уни кўрмасам дунё кўз олдимда чархпалак бўлиб айланар, кўнглим мусибат қуюни билан тўлар,
ҳар куни эрталаб ва кечқурун уни узоқдан кўриш учун бўлса ҳам у қўналға қилган талабалар ётоқхонаси атрофида ўралашиб юрар, уни кўргачгина ўзимга келиб, ижарадаги хонамга қайтиб, худди ўликдай қимирламай ётардим.

***
уни гоҳ даҳлизда, гоҳ зинада, гоҳида
кутубхонада, гоҳида сабоқхонада учратиб қолардим:

кўришим билан еру кўкда
ҳаракат тўхтар,
фақат унинг нафаси ва менинг юрак уришим эштилар, гўё чархидун менинг юрагимда айланаётгандай мен азал-абаднинг, тирикликнинг, ҳаётнинг ва кечмишу кечилмишларнинг қоқ марказига – оламнинг таянч нуқтасига айланардим. Батафсил...

Телеграм каналга уланиш:
"Шарқ Юлдузи" журнали Ochish/sharhlash

2022-08-30 12:06:12 #Новелла (3-сон/2020)
Дилором АБДУРАҲМОН

ҲАЛИНЧАК

...Киприкларимда кўтариб юрдим уни, гоҳо шудринг каби сирғалиб юзимга тушди, лабларимга, кўксимга, юрагимга томди. Мен унинг ҳароратини сездим, у қонимнинг ҳароратига баробар эди. Мен унинг таъмини сездим, унинг таъми шўр эди. У шунчалар бетоқат, саркаш шарпаси ойдинда теграмда айланар, тунлар тушларимнинг тоқи узра қанот қоқиб турарди. У шунчалар безовта, бетизгин эдики, юрак уришларимни темир йўл устида Самарқанд томонларга елиб бораётган поездларнинг “тарақа-туруқ”ларига олиб бориб қўшиб қўярди. Чангали шунчалар чайир эдики, кўринмас занжир каби ихтиёримни кишанлади. Бағримни унинг беҳаловат чақмоғи урди, зарбидан ботинимда беҳузурлик титроғи пайдо бўлди. У эса теграмда айланиб менинг беҳол аҳволимни тамоша қиларди...Батафсил...

Ва ниҳоят бир куни эрта тонгда унга қараб:
– Сенинг исминг СОҒИНЧ, – дея шивирладим. У индамади, тилсиз, забонсиз эди.

Телеграм каналга уланиш:
"Шарқ Юлдузи" журнали Ochish/sharhlash

2022-08-29 10:17:41 #Назм (3-сон/2022)
Самандар ВОҲИДОВ

Сен борарсан ортингдан

Сен борарсан ортингдан,
Оҳлар борар эргашиб.
Оҳлар қаро, сен оқсан,
Оқу қаро қоришиб.
Қалбимнинг дарчасидан,
Мўралайман ортингдан.
Бир садо инграр шу дам:
“Нигоҳингни торт мендан”.
Тўсиқ тизиб киприкдан,
Нигоҳ йўлин тўсарман.
Энди, судраб оҳларни,
Қароғимда кезарсан...
...Қаро оҳга қоришиб,
Қораясан уфқда.
Қалб кўкида ҳар саҳар,
Ортар қаро бир нуқта.

Телеграм каналга уланиш:
"Шарқ Юлдузи" журнали Ochish/sharhlash

2022-08-29 08:55:28 #Таржима
Муҳаммад СИДДИҚ

Эрон шеъриятидан таржима

СЕНСИЗ ЗУЛМАТ ИЧРАМАН
Совуқми ошёнинг?
Конвертга озгина қуёш
Солиб сенга юбордим.
Сен бўлса, миттигина юлдузингни
Бирор-бир сўзга жойлаб
Менинг осмонимга юбор,
Сенсиз зулмат ичраман.
Манучеҳр Оташи

ҲЕЧ КИМ СЕНГА ЎХШАМАС ЭКАН
Бир неча кун олдин,
Мен ўйлаб қолдим.
Агар кимнидир севсам ҳам
Сенга ўхшашини севардим.
Аммо билдимки ўша кундан буён,
Ҳеч ким сенга ўхшамас экан.
Комрон Расулзода

ОҒРИҚ
Йўқ, мен эртак эмасман,
Сўйлашинг учун.
Қўшиқ ҳам эмасман,
Куйлашинг учун.
Садо ҳам эмасман,
Тинглашинг учун.
Билсанг, мен – оғриқман,
Эслаганингда бағрингни ўртагувчи...
Аҳмад Шомлу

ЎЧ
Сен ва мен,
Йўл ёқасидаги ойнаванд кафе.
Биз ҳар гал у ерда учрашсак,
Вақт ҳақида унутиб қўярдик.
Энди бўлса, вақт биздан ўчини олмоқда.
Гарус Абдулмаликён

Телеграм каналга уланиш:
"Шарқ Юлдузи" журнали Ochish/sharhlash

2022-08-26 15:06:41 (1-сон/2022)
Одил ИКРОМ

Юрак – ўз йўлига…
Юрак йўлида
Туртиниб-суртиниб тентирар шамол.
Қўй, ёлғиз йиғласин қисмат гўрида
Иккимизини кўмиб юборган хаёл.

Юрак – ўз йўлига…
Биз ҳам қолмадик
Ўша йўлимиздан, ўша турбатдан.
Биз юрак-юракдан айрилолмадик,
Айрилиб кетмоқда юрак-юракдан.

Юрак – ўз йўлига…
Кезиб юракни,
Хаёллар мурдасин ўтармиз босиб.
Биз бирга яшаймиз эзиб юракни,
Агар бирга ўлмоқ этмаса насиб.

Телеграм каналга уланиш:
"Шарқ Юлдузи" журнали Ochish/sharhlash

2022-08-26 11:49:18 #Муҳаррир_минбари (1-сон/2022)
Сирожиддин РАУФ

“Шарқ юлдузи”нинг юлдузли фаолияти

“Шарқ юлдузи” ХХ асрнинг 70-80-йилларида чоп этилган ижтимоий-сиёсий, адабий-бадиий журналлар орасида ўзбек маданий-маънавий ҳаётини ёритишда етакчи, таъбир жоиз бўлса, энг обрўли нашрлардан бири сифатида халқ эътибори, меҳр-муҳаббатини янада чуқур қозонади.

Журнал, ҳақиқий маънода, ўзбек зиёлилари, адабий жамоатчилик минбари сифатида ўз саҳифаларида жаҳон ва ўзбек адабиётида пайдо бўлган янги бадиий асар намуналаридан тортиб, ижтимоий ҳаётда мавжуд долзарб муаммоларни кўтарадиган публицистик асарларни мунтазам чоп этиб борувчи нашр сифатида фаолият юритади.

Мазкур нашр саҳифаларида шеърлар, ҳикоя, роман ва қиссалар, пьесалар, шу билан бирга, турли ҳажвий материаллар ҳамда публицистик асарларнинг мунтазам бериб борилиши айни пайтда ижодкорлар учун ўзига хос мактабни ҳам вужудга келтирди. Батафсил ўқиш...

Телеграм каналга уланиш:
"Шарқ Юлдузи" журнали Ochish/sharhlash