Shahnoza Soatova blogi

2022-09-01 09:32:26 Кечадан бери байрамда айтилган “Гўзал Туркистон” қўшиғини мендан кўпчилик сўради. Марҳамат, мана у!

Чўлпон шеърда Туркистоннинг ўша пайтдаги абгор аҳволини айтиб, “бирлаш эй халқим келгандир чоғи” дейди, бирлашиб Туркистонда янги фаровон давлат қуришга чақиради.

Шеърни бир қанча ижодкорлар куйга солишган. Интернетда изласангиз чиқади. Бироқ турк хонандаси Япрак Саяр ижросидагиси гиря-марш охирги йиллар жуда кенг тарқалди ва севимли бўлди. Хонанда ижтимоий-сиёсий мазмундаги шеърни маҳзун лирик қўшиққа айлантиргани учунми, уни юрак билан тинглайсиз ва қулоғингизда айланаверади, қайта эшитгингиз келаверади. Ютубга бу қўшиқ 9 йил аввал юкланган экан!

Қуллик, асорат – барчаси ёнсин.
Қур янги давлат, ёвлар ўртансин.
Ўсиб Туркистон, қаддин кўтарсин,
Яйраб, яшнаб ўз Ватанинг гул боғларингда!

Мустақиллик байрами муборак бўлсин!

@shahnozxon Ochish/sharhlash

2022-08-31 18:06:50 Мустақиллик байрамида Чўлпоннинг Туркистон мухториятига бағишланган “Гўзал Туркистон” шеъри куйланди!!! Қойил

Бу мавзуга байрамларда мурожаат қилинмасди аввал. Бу ўзгариш қувончли!!

Туркистон мухторияти бизнинг мустақиллик йўлидаги буюк уринишимиз ва буюк дардимиз!

Мустақиллигимиз абадий бўлсин!!

@shahnozxon Ochish/sharhlash

2022-08-31 17:21:35 Президент Шавкат Мирзиёев мамлакатимиз мустақиллигининг 31 йиллигига бағишланган байрам тадбирида халқимизга табрик билан мурожаат қилмоқда.

Тадбирдан онлайн трансляцияни Президент матбуот хизматининг Facebook ижтимоий тармоғи, YouTube видеохостинги ва Telegram видеохостингидаги саҳифаларида томоша қилишингиз мумкин. Ochish/sharhlash

2022-08-31 16:51:05 “Янги Ўзбекистон” боғида Мустақиллик байрами тантаналари бошланиши арафасида.

Байрам муборак, юртдошлар!

@shahnozxon Ochish/sharhlash

2022-08-31 11:54:11 ​​Нима учун 31 августда шаҳидларни хотирлаймиз?

"Президент Шавкат Мирзиёев Шаҳидлар хотираси хиёбонига ташриф буюриб, давлат ва жамоат ташкилотлари вакиллари, нуронийлар билан биргаликда қатағон қурбонларини ёд этди" деб хабар берилмоқда.

Ҳар йили айнан шу куни давлат раҳбари томонидан мазкур мажмуанинг зиёрат қилинишида рамзлар кўп, муҳими, жуда хайрли ва ҳикматли анъана. Аммо унга қачон ва нима учун асос солинган? Мавзу тарихини биласизми?


Кўпчиликка маълум, Юнусободдаги Бўзсув бўйида 1937 йил 4 октябрь куни бир қатор зиёлилар, жадид боболаримиз отилган. Бунинг тарихи мактаб дарсликларида бор.

Ўзбекистон мустақилликка эришгач Мустақиллик учун курашган боболаримиз хотирасини абадийлаштириш мақсадида 31 августни Ўзбекистонда Қатағон қурбонлари хотираси куни сифатида нишонлай бошладик.

Ушбу санани нишонлаш ҳақидаги Ўзбекистон Республикаси Президенти Фармони 2001 йилнинг 1 май куни қабул қилинган эди.

2002 йилнинг 31 август куни эса "Шаҳидлар хотираси" ёдгорлик мажмуасининг очилиши бўлиб ўтди. Бу кун ҳар йили мамлакатда Қатағон қурбонлари хотираси куни сифатида нишонланиб келмоқда.

Бундаги рамз ҳикматли – биз аввал Мустақилликка эришиш учун қурбон бўлганларни хотирлаймиз. Кейингина бу кунни байрам қиламиз.

Бугун Шавкат Мирзиёев ушбу хайрли ва савобли анъанани давом эттириб, мажмуага ташриф буюрди.

Биз мустақиллик шунчаки арзон неъмат эмаслиги, уни ҳимоя қилиш ва қадрлаш зарурлигини ҳозир янада теран англамоқдамиз.

Мустақиллигимиз абадий бўлсин! Ватан озодлиги йўлида жон берган боболаримиз жойлари жанатда бўлсин!

Тақдирни кўрингки, айнан шу бугун собиқ Иттифоқ парчаланиб кетишига сабабчи деб кўриладиган унинг биринчи ва сўнгги президенти Михаил Горбачев вафот этибди.

@shahnozxon Ochish/sharhlash

2022-08-30 21:35:08 “Хотин-қизларимизга, азиз аёлларимизга нисбатан айрим зўравонликларни умуман қабул қилиб бўлмайди” — Шавкат Мирзиёев (менинг Президентим! )

Бугун Кўксарой қароргоҳида Мустақиллик байрами арафасида фахрий унвонларга лойиқ кўрилганларни тақдирлаш маросимида Президент шундай деди.

“Бугун хурсандчилик кунларда кўпчилик муҳокама қилаётган айрим мавзулар кўнгилни хира қилади. Хотин-қизларимизга, азиз аёлларимизга нисбатан айрим зўравонликларни умуман қабул қилиб бўлмайди. Бу бизнинг миллатга хос бўлмаган чидаб бўлмас иллат.

Бунга қўл урганлар аёл қиёфасида ўз онаси сиймосини эсласин. Оқила опа-сингилларимиз бундай муносабатга лойиқ эмас!” – деди Шавкат Мирзиёев.

“Ўзида бир гап бор”, “бекорга урмайди” ва ҳоказо деб зўравонликни ёқлайдиганларга постни юборамиз!

@shahnozxon Ochish/sharhlash

2022-08-30 19:10:33 Ўзбекистонга энг катта DCP форматли экран олиб келинди

Кинематография агентлиги Тошкент халқаро кинофестивали арафаси томошабинлар учун олиб келинган DCP форматдаги катта экраннинг тақдимотини ўтказди. Пойтахтдаги Киночилар уйига ўрнатилган экран орқали биринчи марта "Барон-2. Соғинч" фильми томошабинлар эътиборига ҳавола қилинди.

Кинематография агентлиги раҳбари Фирдавс Абдухолиқов тақдимотда Киночилар уйида содир бўлаётган ўзгаришлар ҳақида гапирар экан, кинотеатрга жами 5 та экран – бино ичига 4 та DCP ва 1 та ёзги LED дисплей жойлаштирилишини айтиб ўтди.

— Эртадан бошлаб бу ерда Ўзбекистон Республикаси мустақиллигининг 31 йиллигига бағишланган байрамолди намойишлари бошланади. Кинотеатр юртимиз аҳолиси ва меҳмонлар учун очиқ, — деди Агентлик раҳбари.

Маълумот учун, масштабли экраннинг кенглиги 29,5 метр ва баландлиги 14 метрни ташкил этади. МДҲ давлатлари ичида ҳозирча ягона бўлиб турган киноэкран Франциянинг Harkness Screns компанияси томонидан яратилган. Ochish/sharhlash

2022-08-30 13:24:18 Тестга кирганлар:
Қизлар 571 719
Йигитлар 502 103

Ўртача балл:
Қизлар 66,8
Йигитлар 63,7

Бу йил қизлар ТОП! (Ўтган йили ҳам қизлар кўпроқ киришувди)
Энди улар битириб, ишлаб, жамиятга фойдаси тегадиган кадрлар бўлиши керак. Ҳали олдинда яна босқичлар, синовлар бор...

Аслида, қиздир-йигитдир – шу юрт фарзанди, генофондимиз. Истеъдодларга имкон бериш керак: давлат ҳам, жамият ҳам, оилаю яқинлар ҳам. Ҳаммамиз учун бунинг фойдасини англашимиз лозим. Ақлли ёшлар кўпайсин

@shahnozxon Ochish/sharhlash

2022-08-28 14:21:41 Қуйичирчиқда ўз эри томонидан икки боласининг кўз ўнгида пичоқлаб ўлдирилган аёл эри томонидан муттасил калтакланиб келинган, 3 ойдан бери отасиникида яшаётган бўлган, келин бўлиб тушган маҳалласидагилар ҳам, ишхонаси ҳам уни ориятли, иффатли аёл деб таърифлашяпти, эрида маниакал рашк касаллиги бўлган. Kun.uz суриштирувини батафсил кўринг.

Аламлиси, участка инспекторининг вақтида чора кўрмагани. У жиноятнинг олдини олиши мумкин эди балки. Лекин жабрланувчидан ариза олгач, аллақандай шахсий ишими, дала ишими, “развод”ми, хуллас, бошқа томонга кетган, бир суткадан ортиқ вақт ўтгач қотиллик рўй берган.

Энди эса тинмай мажлислар қилишаётганмиш шу масалада.

Айримлар аллақачон аёлни зинода гумонлаб бўлди — гуноҳмасми? Бечора аёл ҳам азобда яшади, ҳам қийналиб ўлди, ўлиб ҳам шунча гап-сўзга қолди.

Миянгизда ниманидир тузатиб олишингиз кераклигини ҳалиям тушунмадингларми, АЙРИМЛАР???

Даҳшат! Ochish/sharhlash