Умрим ўтиб борар жимгина, бесас,
Тақдир сўқмоғидан ўтиб кетяпман.
Билдим, бу дунёнинг ишлари абас,
Мен-чи, армон қўлин тутиб кетяпман.
Ҳаёт бу сарҳадсиз узун бир йўлдир,
Гоҳ қувонч, гоҳ ғамда жадал кетяпман.
Гоҳида дуч келар гуллар, чаманлар,
Гоҳ йўлим чақиртош,шағал, кетяпман.
Баъзан йиғи келар бўғзимни бўғиб,
Сабрнинг отига миниб кетяпман.
Ғамлар елка тутса кўзларин тикиб,
Шодликка нигоҳим илиб кетяпман.
Кўнглимда яшайди яхшилик ҳаргиз,
Аммо ёмонлардан дод деб кетяпман.
Мени унутмагин, эй дўстим,ҳаргиз,
Доимо айлагин ёд деб кетяпман.
РАҲИМА МЎМИНОВА
Kimga yuborishni bilasiz
Kanalga kiring https://t.me/sevgim_yuragimda_kartinkalar