2022-07-23 05:35:58
Умумтаълим мактабларида педагогик ставкаларни қисқартириш юзасидан ҳеч қандай ҳавотирга ўрин йўқИқтисодиёт вазири Жамшид Қўчқоровнинг кечаги чикишидан кейин Республика таълим маркази деректор ўринбосари Исроил Тиллабоев Иқтисодиёт ва Молия вазирлиги билан боғланиб, вазиятга ойдинлик киритди.
Шундан сўнг Иқтисодиёт вазирлиги умумтаълим муассасаларида битта синфдаги ўқувчилар сонининг 36 нафардан 40 нафаргачани ташкил этиши ва ушбу ҳолат таълим сифатига салбий таъсир кўрсатиши юзасидан билдирилаётган
эътирозлар бўйича расмий баёнот берди.
«Бугунги кунда республика бўйича умумтаълим мактабларида синфлардаги ўқувчилар сони тўлиқлилиги ўртача 25 нафарни ташкил этади. Бироқ, айрим мактабларда ушбу кўрсаткич 40 нафар бўлса, айримларида 20 нафарни ташкил этади.
Ушбу кўрсаткич бўйича Тошкент шаҳрини таҳлил қиладиган бўлсак, синфлардаги ўқувчилар сони тўлиқлилиги ўртача 31 нафарни ташкил этади. Бироқ, алоҳида таълим муассасалари кесимида олиб қаралганда 78 та мактабда синф тўлиқлиги 30 нафардан кам бўлса, 23 та мактабда синфлардаги ўқувчиларнинг ўртача сони 35 нафардан 40 нафаргачани ташкил этмоқда. Шу билан бирга, хозирги вақтда умумтаълим мактабларида айрим фанлардан ўқитувчиларнинг етишмовчилиги юзага келмоқда.
Маълумот учун: умумтаълим мактабларида жами 500 мингдан ортиқ ўқитувчи фаолият юритса, шундан бугунги кунда 20 фоизи 1,0 дан ортиқ педагогик ставкада ишлайди. Шунингдек, ҳалқаро тажрибанинг тахлили шуни кўрсатаяпди-ки, Ўзбекистонда ўқувчиларнинг ўқув юкламаси таълим сифати юқори бўлган бошқа давлатларга нисбатан кўпроқ.
Аҳоли сонининг ўсиш кўрсаткичларини инобатга оладиган бўлсак кейинги 5 йилда мактаб ўқувчиларнинг сони 7,7 миллион нафарни ташкил этиши ёки бугунги кундаги кўрсаткичга нисбатан 1,5 миллион нафарга ортиши кутилмоқда. Кейинги 5 йилда мактаб ўқувчилари сонининг ушбу тарзда ўсиши фонида педагогик ставкалар сони ҳам шунга мутаносиб равишда кўпаяди.
Ўқув дастурини такомиллаштириш бир кунлик масала эмас. Бу масала таълим соҳасидаги ислохотлар доирасида ўқитувчилар, мутахассислар ҳамда ҳалқаро экспертлар иштирокида кенг муҳокамадан ўтиши зарур.
Агар ушбу муҳокамалар доирасида умумтаълим мактабларида ўқув дастурини мақбуллаштириш хулосасига келинса, шунга тегишли равишда ўқитувчиларнинг педагогик юкламаси миқдори ҳам ҳалқаро тажрибадан келиб чиқиб, қайта кўриб чиқилиши зарур. Ўз навбатида, бугунги кунда умумтаълим мактабларида педагогик ставкаларни қисқартириш юзасидан ҳеч қандай ишлар олиб борилмаётганлигини маълум қиламиз.» - дейилади Иқтисодиёт вазирлигининг расмий баёнотида.
153 views𝓜𝓪𝔁𝓵𝓲𝔂𝓸 𝓡𝓾𝓼𝓽𝓪𝓶𝓸𝓿𝓷𝓪, edited 02:35