ЖАННАТУ ДЎЗАХ – ҲАҚ Эрур жаннату дўзах ҳоло мавжуд, Яратибдур | Sayyid Rahmatulloh Termiziy🌙

ЖАННАТУ ДЎЗАХ – ҲАҚ

Эрур жаннату дўзах ҳоло мавжуд,
Яратибдур ани халқиға маъбуд.
Кўнгилға солма, эй ақли пиёда,
Сиғар ул икки манзил қайси жоға.
Агар амр айласа кавнайни барной,
Бўлур бир пистанинг пўчоғина жой.
Кирар дўзахга кофир, қайта олмас,
Азоб сахатидин ҳаргиз қутулмас.
Ҳамиша қолмағай иймонли банда,
Тутар охир қўлин иймони анда.
Агар афв этса осоми кабойир,
Дегил жоиз, Удур Ғофиру Сотир.
Сағирадин агар тутса Худованд,
Дегайсан эрк анингдур, эй хирадманд.
Ўзи Ғаффор, Ўзи Қодир Худодур,
Қулина ҳар на ҳукм этса раводур.
Наъувзу биллаҳ истеҳлоли исён,
Олур мўмин кишидин шамъи иймон
Беҳишт ичра кишиким бўлса дохил,
Бўлур анда ҳама мақсуди ҳосил.
Тирикдур доимо, андин сўнг ўлмас,
Аламдин, ҳузну ғамдин зарра бўлмас.
Ҳамиша айш ила ишратда банда,
Кўнгилга кечмаган иззатлар анда.
Агар жаннат билан дўзахни авсоф,
Қилурға жамъ бўлса, қоф то қоф.
Адо бўлмас икки манзил сифоти,
Ани яхши билур Тангримнинг зоти.
Икки манзилнинг васфи сони ўлмас,
Алар аҳли билан ҳеч фоний бўлмас.
Битибдур шориҳул “Аврод” ани,
Ки, бўлмас Аршу Курсиййу Руҳ фоний.
Фано бўлмас деди Лавҳу Қалам ҳам,
Ақида булдур, а фарзанди Одам.

Сўфи Оллоёр.
@rahmatulloh_domla