2021-01-05 17:58:53
#maqola
#ishtirokchi_29
Yangi O'zbekistonda yangicha yangi yil
Ortda qolgan 2020-yil...
Pandemiya 2020-yil uchun yil so'zi bo'ldi. Muammoli vaziyatlar inson ruhiyatiga va jismoniy quvvatiga ta'sir o'tkazmay qolmadi. Butun dunyoga tahdid solayotgan muammo - koronavirus bilan kurashish o'z-o'zimizni nazorat qilib yashashga majbur qildi.
Tan olish kerak, u har qanday holatda tadbirli va tartibli bo‘lishimiz lozimligini ko‘rsatdi. Bejizga “Tadbir bandadan, taqdir esa yaratgandan” deyishmagan. Avvalgi holatimizni bir eslaylik-a, oilamizda, o'qish yoki ishda, hatto, kimdir gripp yoki shunga o‘xshash kasallikka chalingan bo‘lsa-da yonimizda bemalol yo‘talib ham, aksirib ham yuraverardi. Bunga e’tibor ham qilmasdik, hatto bir-birlarimizga ham yuqtirib olardik. Qanchalik tadbirsiz, qanchalik tartibsiz va qanchalar e’tiborsiz bo‘lgan ekanmiz, afsus.
Virus bilan kurashish bizni poklikka, tozalikka o‘rgatdi. Sog‘lik yaratgan tomonidan bizga berilgan qanchalik ulkan boylik ekanligini ko‘rsatdi. Bir-birimizni qadrlashimizni bildirib, yuragimizda sog'inch hissini uyg'otdi. Boriga qanoat qilib shukur qilishni o'rgatdi.
Biz o'tmishi ulug', kelajagi buyuk, insonparvarlik oliy darajada qadr topgan yurt farzandlarimiz. Qalbimizdagi umid va ishonch yana olg‘a qadam bosishga, qiyinchiliklarni yengishga undadi. Davlatimizning bu borada olib borayotgan siyosatida eng avvalo kam ta’minlanganlar, jamiyatning ijtimoiy himoyaga muhtoj qatlamiga yordam ko‘rsatish, ularni karantinda joriy etilgan tartib-qoidalar bois yuzaga kelayotgan qiyinchiliklar va noqulayliklardan asrash kabi muhim jihatlar birinchi o‘ringa qo‘yilganini ko‘rishimiz mumkin. Aksariyat davlatlarda ushbu kasallikka chalingan bemorlar tuzalishi uchun o‘z hisobidan katta mablag‘ sarflashlariga to‘g‘ri kelayotgan bir paytda bizning yurtda bemorlar mutlaqo tekin, davlatimiz g‘amxo‘rligi ostida, jahon standartlariga to‘la javob beradigan davo muolajalarini olishdi.
Nihoyat, 2020-yil tugab,yangi 2021 -yilga qadam qo'ydik.
2021-yil yurtimizda "Yoshlarni qo'llab-quvvatlash va aholi salomatligini mustahkamlash yili" deb nom oldi. Bu esa men shu yurtning yoshlaridan biri bo'lganimdan, hamda sog'liqni saqlash sohasida tahsil olayotganimdan qalbimda ikki karra faxr va iftixor tuyg'usini shakllantirdi.
Yangi yilda hukumatimiz tomonidan juda ham ko'plab, barcha sohalarni qamrab oladigan tashabbuslar, loyiha va dasturlar rejalari ishlab chiqildi. Mehnatkash, tanti, sabr-matonatli xalqimiz yordamida inshaolloh yil yakunida rejalar amalini ko'rajakmiz.
Abror A'zamov
Samarqand viloyati Samarqand davlat tibbiyot instituti davolash fakulteti 4-bosqich talabasi
204 views14:58