2023-04-12 06:45:20
#xushxabar
Kitobsevar xalq uchun mutolaa imkoniyatlari kengaytiriladi Kuni kecha Prezident Sh.Mirziyov raisligida yoshlar siyosati sohasidagi ishlar natijadorligini oshirish chora-tadbirlari yuzasidan videoselektor yig‘ilishi o‘tkazildi.
Yig‘ilishda yoshlarning bo‘sh vaqtlarini mazmunli tashkil etish, ularning ish bilan ta’minlanish samaradorligini yanada oshirish, yoshlar bilan ishlash tizimini tubdan yaxshilash maqsadida mutasaddilarga tegishli ko‘rsatma va topshiriqlar yuklandi.
Jumladan, Buxoro, Samarqand, Xiva, Termiz, Shahrisabz, Qo‘qon kabi turistik majmualarda, shahar va tumanlardagi markaziy park va xiyobonlarda “Ochiq osmon ostida kutubxona”lar tashkil etilishi qayd etildi.
Shu bilan birga, kutubxonachilik va yoshlarni kitobxonlikka jalb qilishni maqsad qilgan tashabbuskorlar uchun ajoyib imkoniyat yaratiladi. Ya’ni o‘z hisobidan kutubxona barpo etayotgan tashabbuskorga mingtadan o‘zbek va jahon adabiyotining durdona asarlari taqdim etiladi. Eng muhimi, ular davlat hisobidan kompyuter bilan jihozlanib, Milliy kutubxona bazasiga ulanadi.
Eng ommabop va xaridorgir jahon bestsellerlari bilan ham yoshlarni tanishtirib borish maqsadida joriy yil 1-maydan boshlab yoshlar, talabalar, maktab o‘quvchilari o‘rtasida so‘rovlar o‘tkaziladi. So‘rovda eng ko‘p ovoz berilgan xorij adabiyotlari o‘zbek tiliga tarjima qilish bo‘yicha davlat buyurtmasi joriy qilinadi. Xususiy nashriyotlarga bu borada kreditlar foizini qoplab berish, garov ta’minoti bo‘yicha yengilliklar beriladi.
Axborot va ommaviy kommunikatsiyalar agentligi kitobxonlik targ‘iboti bo‘yicha har yili an’anaviy tarzda tashkil etadigan ko‘plab tadbirlari doirasida davlat rahbari tomonidan ilgari surilgan yuqoridagi tashabbuslarni qo‘llab-quvvatlaydi hamda hamkorlikda amaliy choralarni ko‘rishga tayyorligini bildiradi.
@salamaxloqlashamiz
133 viewsedited 03:45
S
