2022-12-30 20:20:35
Eski yilda qo'ygan 7 ta ulkan maqsadimdan 6 tasi amalga oshibdi.1. Mashina olish:Bu vazifani —qurbim yetadimi yoki yo'qmi — bilish uchun, qiziqishdan qo'ygan edim. Chunki ko'pchilik pul yig'ish bo'yicha sabri uzoqqa chidamaydi. Men esa sabrimni sinab ko'rdim va bu voqea mashina olishdan ko'ra sabrimni tarbiyalashga katta yordam berdi. Sabrning natijasi "Cobalt". Menimcha, yomon emas. Chunki bu mashinaga to'liq o'z mehnatim bilan erishdim.
2. Shaxsiy rivojlanish uchun kitob o'qish.Yil boshida "Tazkirat ul-avliyo"dan boshlangan mutolaa "Vavilonlik boy odam tarixi", "Uchgacha ayni vaqti", "Uchdan keyin kech" kabi o'nga yaqin ajoyib kitoblar mutolaasiga ulanib ketdi.
3. Bakalavr darajasiga erishish va diplom olish:4 yillik bakalavrni bir yarim yilidagina o'qishga bordim. Ochig'i, universitetni bitira olmasam kerak, menga diplom berilmasa kerak, degan fikrlar bor edi xayolimda. Ammo peshonaga yozilgan ekan: hamma fanlardan baholarni yopa oldim va ilk bakalavr darajasiga va O'zbekistonda "o'zi ulug', suprasi quruq bo'lgan" diplomga ega chiqdim. Nega diplom haqida bunday deyapman? Chunki bizning sohada ko'tarilish uchun faqatgina iqtidor asosiy ko'rsatkichni belgilaydi.
4. O'quvchilarni o'qishga tayyorlashda shaxsiy rekordni yangilash:
Bu yil 20 tadan ziyod asosiy blokdagi o'quvchilarim grant asosida talabalik baxtiga muyassar bo'ldi. Kontraktni esa hisoblamadim. To'g'ri, ular orasida ayrim yiqilgan insonlar ham bor. Buni ham tan olish lozim. Abituriyentlik — bu urush. Urush esa qurbonsiz bo'lmaydi. Maqdas kam talafot bilan jangni yakunlash. Kelgusi yil uchun ham asosiy maqsadlardan biri yanada rivojlanish va ko'proq odamni talabalikka erishishiga ko'maklashish.
5. Sayohat va tajriba:Bu yil va nihoyat O'zbekistonni gorizontaliga to'liq kesib chiqa oldim. Hatto chet elga (Turkiyaga) ikki haftaga borib qaytishga ham ulgurdim. To'g'risi, bu sayohat juda katta tajriba ulasha oldi. Sababi hech kimning ko'magisiz, yakka o'zim chet elda yurishni va yashashni o'rgandim. Bu esa chet elga magistraturaga ketishga qaror qilishim uchun katta turtki bo'ldi.
6. Haydovchilik guvohnomasini olish3 oylik o'qishdan so'ng ko'pchilik boshqa yo'llar bilan guvohnomani qo'lga kiritishga harakat qilayotganda bu yo'ldan to'liq voz kechdim. Yo'lda yurish madaniyati — bugungi kundagi O'zbekistonning eng katta muammolaridan biri. Men esa unga yanada zarar bergim kelmadi. Imtihonlarga tayyorlanib guvohnomani 100%lik natija bilan qo'lga kiritdim.
7. Amalga oshmagan rejam: IELTS olish va magistraturaga o'qishga kirish.Bu yildan boshlab magistraturaga o'qishga kirish uchun chet tilidan sertifikat talab qilina boshlandi. To'g'risi, bu vazifani amalga oshirishga menda vaqt umuman yetmadi va boshlangan til o'rganish jarayoni bir oydan so'ng o'z yakuniga yetdi. Qolaversa, o'zimga mos vaqtda mos guruhni topa olmaganim ham ingliz tilini to'xtatishimga asosiy sabablardan biri bo'ldi. Ammo oktabr oyidan Toshkentdagi nufuzli markazlardan biri "IELTS zone" o'quv markazida yana ingliz tilini o'qishni boshladim. Endilikdagi rejam IELTSdan yuqoriroq natijani qo'lga kiritish va chetga magistraturaga ketish.
Yangi yilga yangi 7ta reja tuzish ustida bosh qotiryapman. Sizga ham tavsiya beraman.
273 viewsedited 17:20