Келинг,
Уришмайлик бугун, шу сафар.
Бир гал "мен"имизни четга сурайлик.
Араз, гиналарни қувиб дарбадар,
Керагидан кўпроқ меҳр берайлик.
Эҳ, битта табассум неларга қодир,
Ширин каломга қул не-не ҳоқонлар.
Тўнини тескари киймасми ахир,
Меҳр, эътиборга мухтож одамлар.
Келинг, уришмайлик, бугун, шу сафар,
Ишқнинг бурчакда жим туришин кўринг.
Мен эркалик қилиб, лаб бурсам агар,
Мухаббатим ҳаққи минг бор кечиринг!
Биламан, йигитнинг ғурури баланд!
Уни эголмайди на ёр, на ағёр.
Тил ўлгур нималар деса, десину,
Кўнглимнинг минг битта узрлари бор!
Келинг, жим турайлик бугун бир марта,
Кибр кўчасини четлаб ўтайлик.
Сўзлар сўзлайверсин майли беш баттар,
Бизчи, кўнглимизга қулоқ тутайлик.
Кет деманг,
Бас деманг
Ҳудо асрасин!
Қаҳрли сўзларни сақланг қамоқда.
Ахир кўзларингиз мулойим, ҳазин,
Мен сени севаман,жоним демоқда!
#Maftun
Bizning rasmiy sahifamiz
@Yolgizim @Xiyonat
