2022-08-30 15:55:14
BORINGCHA SEVAMAN
(Sheʼriyat tanloviga yuborilmagan sheʼr)
Kechir, yomoningni yashirolmayman,
Bor yaxshingni qoʻshib oshirolmayman,
Chin jomin yolgʻonla toshirolmayman
Boringcha sevaman seni Qoʻshrabot!
Ravondan ravonmas yoʻllaring koʻproq,
Bobolardan qolgan qum,shagʻal,tuproq
Orzuyim - boʻlsaydi eʼtibor koʻproq
Boringcha sevaman seni Qoʻshrabot!
Jildiroq jilgʻayu,soylaring bilan,
Kambagʻal,oʻrtahol,boylaring bilan,
Marmaru,granit,loylaring bilan
Boringcha sevaman seni Qoʻshrabot!
Uzumzor,yongʻoqzor bogʻlaringni ham,
Bulbulu,kakligu,zogʻlaringni ham,
Lalmikor dalalar,togʻlaringni ham
Boringcha sevaman seni Qoʻshrabot!
Tan boshqa - dard bilmas aʼzolaring bor,
Qaylardandir kelgan kazolaring bor,
Haq gaplarim uchun jazolaring bor
Boringcha sevaman seni Qoʻshrabot!
Hakamlarga kulcha,konvertlar tutmam,
Mukofot,muruvvat,olqishlar kutmam,
Ne bersang,xalqga ber,xalqni unutmam
Boringcha sevaman seni Qoʻshrabot!..
U. Yusupov
Biz bilan aloqa:
@Qoshrabotliklar_kanali_bot
Fikr va izoh uchun:
@qoshrabotliklar_chat
Telegram sahifamiz:
@qoshrabotlik
2.6K viewsedited 12:55