АЛЛОҲГА НИМА ДЕЙМАН? Кимдир ўйлар, эртага Нима ичиб, не ейма | Қораланган Кутубхона

АЛЛОҲГА НИМА ДЕЙМАН?

Кимдир ўйлар, эртага
Нима ичиб, не ейман?
Мен-чи ўйлайман, ўлсам,
Аллоҳга нима дейман?

Гохи харом ютганман,
Нахс қўлидан тутганман,
Намозни унутганман,
Аллоҳга нима дейман?

Нафс ортида турганман,
Хирс йўлида юрганман,
Юзим айбга бурганман
Аллоҳга нима дейман?

Шайтон елкамга минса,
Ихлос чечагим синса,
Бир кун юрагим тинса
Аллоҳга нима дейман?

Айбга тўла тўрт ёним,
Бўшдир савоб хамёним,
Чўғда ёнарми жоним,
Аллоҳга нима дейман?

Гуноҳларим бир гала
Хайрияларим чала,
Дуойим беҳафсала
Аллоҳга нима дейман?

Қaзo Бомдод, Пешиним,
Аср, Шом ва Хуфтоним,
Йиғлаётир виждоним
Аллоҳга нима дейман?

Подшоҳ билиб боламни
Гоҳ ранжитдим отамни,
Йиғлатмишам онамни,
Аллоҳга нима дейман?

Хушим олди жанонлар
Дўст тутинди нодонлар,
Тил сўзлади ёлғонлар
Аллоҳга нима дейман?

Гарчи номим мусулмон,
Ғайридиндайман нодон
Ёдламам сура Қуръон
Аллоҳга нима дейман?

Юрагим ҳадиксирар,
Кўзимда ёш ялтирар,
Тиззаларим қалтирар,
Аллоҳга нима дейман?

Май тўлдириб қадаҳга,
Чипта олиб дўзаҳга,
Қолдимми, эх мазаҳга
Аллоҳга нима дейман?

Гунохим кўплигидан,
Сиротнинг кўпригидан,
Қандай ўтадирман ман?
Аллоҳга нима дейман?

Гоҳи бўлдим такаббур,
Хеч қилмадим тафаккур,
Қўрқдим қилиб тасаввур,
Аллоҳга нима дейман?

Дардим бор шу жумлада
Хафтада бир Жумъада
Масжиддаман бир марта
Аллоҳга нима дейман?

Айб қилиб, айтмай узрим,
Кўпларга қилдим кибрим,
Чаён тўларми қабрим?
Аллоҳга нима дейман?

Номаҳрамни қучоқлаб,
Рақибларим пичоқлаб,
Яшадим ёвни талаб,
Аллоҳга нима дейман?

Берилиб кайф-сафога,
Вафо қилмай вафога
Мукка кетдим зинога,
Аллоҳга нима дейман?

Ох, ақлимни занг босди,
Жойнамозим чанг босди,
Хатокордирман, рости,
Аллоҳга нима дейман?

Мен пули кўп бечора,
Тополмаяпман чора,
Аллох олмас-ку пора
Аллоҳга нима дейман?

Нафсингга бердинг деб эрк,
Хирсингга бердинг деб эрк,
Сенга деса ЖАННАТ БЕРК!!!
Аллоҳга нима дейман?

Юзланганимдир Каъбам,
Илтижо қилсам ҳар дам,
Қабулмикан-а тавбам,
Аллоҳга нима дейман?

Гуноҳ бисёр, савоб йўқ,
Саволлар кўп, жавоб йўқ,
Мендай ҳоли хароб йўқ,
Аллоҳга нима дейман?

Абдурроҳман Мешаян

Каналга уланиш
https://t.me/+yBpVVg03318wMjFi