2023-05-10 09:42:00
Қизин узатолмай қолган оталар...
Бундан уч йил олдин, ноёб қобилият, ажойиб табиат соҳибаси, раҳматли қизим, айни баҳор фаслида, мучал ёшида чин дунёга бизни тарк этиб кетганди.
Ишдан чарчаб келсам, узун сочи ер қадар тегиб, олдимга пилдираб "кофе" дамлаб келардида, елкамга осилиб, "Адажон, сиз зўр шоирсиз, мен учун ҳам ёзишиз керак, катта бўлсам одамларга ҳолис кутубхона очамиз, у ерда мен ишлайман, шунда ҳамма китоб ўқийди..." дерди.
Қизимдан кейин унинг хотирасига ёз бўйи хеч қайда ишламай ўз хунармандлигимда қизим орзу этган кутубхонани солдим.Кутубхонамдаги китоблар орасида қизим ўз овқатига берилган пулларига йиғиб олган китоблар, менга аталган шеьрлари жамланган дафтарлар бор.Ҳали уларни очиб, тўлиқ ўқиб чиқмаганман.Юрагим чидамайди, ичим ёниб кетади... Бу шеьримни фарзанд доғини кўрганлар тушинади. Зеро, оталар қалбининг қизларига бўлган меҳри оналар меҳридан кам эмас...
Азизлар, зўр шеьрлар ёзишим вадасини олиб кетган, қизим ҳаққига дуо қилинг..."Жойинг жаннатларда бўлсин, қизим Гулҳаё!"
Кечалар суратин бағрига босар,
Дилдан суҳбатлашиб толган оталар,
Икки қароғидан кўз ёши тошар,
Қизин узатолмай қолган оталар.
Қизлари борларни суйиб ўтади
Соғинса жонидан тўйиб ўтади,
Ичлари кул бўлиб, куйиб ўтади...
Қизин узатолмай қолган оталар.
Қўлидан чой ичиб, кўрган меҳрини,
Кўрмаган камолга етган умрини,
Соғинса қучоқлар жажжи қабрини...
Қизин узатолмай қолган оталар.
Кунлари шамолда ўйнар шам пилик,
Билмаслар, гоҳ ўзин ўлик ё тирик.
Қалтираб тўйларда айтади табрик...
Қизин узатолмай қолган оталар.
Кўнглин пештоқига илиб розини,
Асрар, армон бўлган - оқ либосини,
Эслайди фаришта гулин нозини...
Қизин узатолмай қолган оталар.
Гарчи қисматига нолиш йўқ, қасд йўқ,
Ношуд бандасига мангу жаннат йўқ,
Фарзанд доғидайин, оғир бир дард йўқ...
Қизин узатолмай қолган оталар.
Айрилиб кўксини лолазоридан,
Юраги ўртанар бола зоридан,
Мурод куйлар, қалбин нолазоридан...
Қизин узатолмай қолган оталар.
Муроджон Жўраев.
318 views06:42