2023-03-07 22:18:16
ERKAKLAR KUNI
Deydilar mart oyin sakkizinchisi
Ayollar bayrami, ayollar kuni.
Bormi bu olamda erkakka ham kun?
Yoki yorishmasmi erkakning tuni?
Esini taniboq yugurar ishga,
Murg‘ak yurak bilan yer oila g‘amin.
Pul topdi deguncha chopadi uyga,
To‘ldiray deydi-da ro‘zg‘orning kamin.
Mo‘ylabi sabz urmay turadi g‘ozdek,
Xo‘rozdek asraydi mahramlarini,
Opasi - nomusi, singil - g‘ururi,
Qizg‘anar onasin ro‘mollarini.
Juft bersa, ishonmay zaminu ko‘kka,
Asrab-avaylaydi qorachig‘idek,
Yugirar osh-nonu uy-joy ko‘yida,
Uyiga tashiydi chumolilardek.
Qora qozonini qaynatayin deb,
Kezadi ajamu arab yurtini,
Farzandim hech kimdan kam bo‘lmasin deb,
Fidolar qiladi bor vujudini.
Bir aybi bor – adl, ishonar, sodda,
Makru hiyla bilmas, momiq ham emas,
Lekin uning o‘ngi doim ichida,
Dildagi har so‘zin izhor etolmas.
Uning mehrin istang xizmatlaridan,
Yolg‘onni ep ko‘rmas hargiz o‘ziga.
Muhabbatin toping mushfiq qaddidan,
Fidodir ming joni aytgan so‘ziga.
Xalqiga borini sochganlar ular,
Vatanga ko‘ksni qildilar qalqon,
Peshona teridan qurib dunyoni,
Kashfu ixtiro ham ulardan ayon.
Ulardan chiqqandir payg‘ambarlar ham,
Podshohlik doim ular qo‘lida.
Mujtahid olimlar ularga xosdir,
Tolmaslar ilm-fan, ravnaq yo‘lida.
Ular ham izzatu hurmatga loyiq,
Ular ham mehr va eʼtibor istaydi.
Uch yuz oltmish to‘rt kun ishladi, axir,
Erkakka ham bir kun bersa arziydi.
Bu so‘zlar barchasi samimiy, adl,
Erkakni maqtasam, kelmasin malol,
Har qancha bo‘lsa ham shonu shavkati,
Erkakni dunyoga keltirgay ayol.
Qarasam, hamma ayollarni maqtab, taʼriflab sheʼr yozarkan, bir erkaklarni ham taʼriflay dedimda...
Hasanxon Yahyo Abdulmajid
03.03.2023
433 viewsمسلم, 19:18