2020-11-30 20:07:35
“Jajji akademik”ning faoliyatini toʻxtatyapmiz.
2013-2014-yillar edi. Qish oylarida viloyatga borishga yurak betlamasdi. Chiroq ertalab va kechqurun yarim soatga berilardi. Bu ahvol bir necha yillardan buyon davom etardi. Kompyuter, internet u yoqda tursin oddiy televizor koʻrmay, kitob oʻqimay voyaga yetayotgan avlod shakllanib kelmoqda edi. Ahvol mening bolalagim oʻtgan 80 yillardagidan ham xarobroq edi. Biron oʻn yillarda Angola, Burundi, Kongo, Gaiti darajasiga qulamasligimizga biron sabab koʻra olmasdim. Sabablardan biri boʻlarmikan deb “Jajji akademik”ni ochgandik. Bir guruh hammaslak doʻstlar qanot boʻlishgan edi. Ilmiy, intellektual, maʼrifiy jurnal qildik. Bironta ham havoyi, koʻngilochar rukni yoʻq edi. Deyarli hamma maqtadi. Davrimizning ulugʻlari eʼtirof etishdi. Bolalarning ham mehrini qozondik. 69 ta son chiqazdik. Dovrugʻimiz yurt tashqarisiga ham tarqaldi. Ilm-maʼrifatga, kitobxonlikka targʻib qiladigan qator tadbirlar tashkillashtirdik. Jajji akademiklar akademiyasiga asos solib, ilk akademikchalarni sayladik.
Zulmatlarga nur kiritmoqchi boʻlgandik deb oliftalik qilsam, a? Yoki zamonaviy, kamida elektr va internetli dunyo bilan koʻprik oʻrnatmoqchi boʻldik deb koʻpirayinmi? )))
Xullas, eplay olmadik. Jurnal muttasil zararga chiqdi. Umumiy zarar oʻn xonali sonda ifodalanadigan boʻldi. Ammo bu asosiy sabab emas. Iqtisodni amallash mumkin, yaxshilar yeng shimarib turishgani shubhasiz. Masalan, oʻtgan yili bir yaxshi inson jurnalning jamiki qoldiqlarini sotib oldi. Bu yil bir doʻstimiz bir yillik nashr xarajatlarini oʻz zimmasiga olishga tayyor ekanligini bildirdi.
Biz tarqatish, targʻib qilish va, eng alamlisi, ehtiyoj uygʻotishni eplay olmadik. Shu yoʻl – ilm najot ekanligiga odamlarni ishontira olmadik. Bu haqiqatni bilganlarning koʻpchiligi esa bolalariga oʻris tilidagi jurnallarni olib berishadi. Bolalari oʻris maktablarga qatnaydi. Ertangi kunini Oʻzbekiston bilan bogʻlashmagan.
Vaziyatimizdan Xalq taʼlimi vazirligini ham, Yoshlar ishlari agentligini ham, boshqa ehtimoliy aloqador boʻlishi mumkinlarni ham xabardor qilgan edik. Ularning amaliy yordam berish uchun vakolat va imkoniyatlari yoʻqligini bilamiz.
Eng sillamizni quritgan tizim pochta boʻldi. Obuna boʻlgan, xarid qilgan odamlarga jurnallar yetib bormadi va hamon bormayapti. Oʻzimiz mustaqil yetkazib berish tizimini tashkil qila olmasdik. Sof tijoriy, milliardlab foyda koʻradigan tadbirkorlik yoʻnalishlari ham buni Oʻzbekiston sharoitida hozircha eplay olishmaydi.
Loyihaga hissa qoʻshgan barcha hamkasblarimiz, doʻstlarimiz, xayrixohlardan rozilik soʻrayman. Haqqingizni halol eting! Rozi boʻling! Yangi loyihalarda koʻrishguncha!
Sanjar Nazar
38 views17:07
P
