2022-09-04 10:57:25
* * *
Kel, barini boshlaymiz boshdan,
Qoʻy, qiynadik koʻngilni gʻashlab.
Va yurakni yasatib toshdan.
Bu safar men ketaman tashlab.
Sen boʻlasan bu safar majnun,
Hijron seni tutadi oʻqqa.
Men bariga yasayman yakun,
Chiqaraman barini yoʻqqa!
Kel, boshqatdan boshlaymiz...
Bu gal,
Chin sevasan, men esa yolgʻon.
Sen boʻlasan yoʻlimga mahtal,
Men boʻlaman dimogʻi osmon!
Va bu safar sevdirgunimcha,
Poyinga gul tashlayman toʻshab.
Yonganmidim sen deb ozmuncha,
Joni tekin telbaga oʻxshab?!
Endi kelsin senga ham navbat,
Shunday sevki, chidab boʻlmasin!
Menga oʻyin boʻlsin muxabbat,
Senda boshqa chora qolmasin!
Kel, booooshidan boshlaymiz,
Keyin,
Shirin soʻzlab seni etgum rom.
Soʻng mehrsiz qoʻyib atayin!
Seni barbod qilay batamom!
Koʻngil shaxring darvozasin och,
Oq bayroqni qoʻy baland ilib.
Keyin mayli qayga qochsang, qoch,
Eng rahmsiz yovligim bilib!
Kel, boshidan boshlaymiz,
Qoʻrqma,
Men senchalik vahshiy emasman!
Tashlab ketsang oʻlaman dema,
Men qon ichib, yurak yemasman!
Men senchalik vahshiy emasman!
8 views07:57