2022-07-10 09:27:26
Eng go'zal so'z
Shimol bug'usiday yuragim notinch,
Och bo'riday meni quvmoqda qismat.
Vujudni yormoqda dahshatli o'kinch,
Ko'ksimni cho'g' bilan yuvmoqda qismat.
Ona, ko'zlaringni gardishlari mung,
Sochingdagi oqni ko'rmoqmi tayin?
Horg'in nigohlaring sababi nechun?
Nechun sabablaring sirli, yashirin?
Ne sabab mehringni har tafti huzur?
Boshimni tizzangga bog'lagim keldi.
Ona, quchog'ingni sog'indim, axir,
Boladek o'ksinib yig'lagim keldi.
Sen izza bo'lmaysan, bo'lmaysan malol,
Kel deysan, bag'ringni har tarafi bog'.
Dardimni tomchidek yorasan xushhol,
Zumda o'kinchlarim bo'ladi adog'.
Ona, ta'rifingni izlayin nedan?
Ta'rifing yuragim zarbidan qimmat!
Munis-mushfiqqinam, mehribonginam,
Sening borligingni o'zi bir jannat!
Senga she'r bitmadim - so'zim yetmadi,
Qalamning uchida tutganim g'amdir.
Necha kunki, boshdan shu o'y ketmadi,
Ilg'adim, eng go'zal so'z - bu Onamdir!
10 views ꯭{꯭✼}꯭꯭ ꯭𝆺꯭𝅥𝐎𝆺꯭𝅥𝐐꯭𝆺𝅥𝐐꯭𝆺𝅥𝐔꯭𝆺𝅥𝐒꯭𝆺꯭𝅥𝐇𝆺꯭𝅥𝐈𝆺꯭𝅥𝐌꯭𝆺꯭𝅥{✼꯭}꯭꯭꯭ ꯭ ꯭, 06:27
O
