​​​​БИР ЯХШИ НОМ ҚОЛСИН! Пул билан ўлчаманг инсоннинг қадрин, | Оналар Канали

​​​​БИР ЯХШИ НОМ ҚОЛСИН!

Пул билан ўлчаманг инсоннинг қадрин,
Битта чин дўст изланг ёруғ оламдан.
Мол давлат ўлчолмас кўнгилнинг нархин,
Бир яхши ном қолсин сиздек одамдан.

Мансаб, ўрин жойни талашмоқ хато,
Бахтни бойлик билан ўлчаманг асло,
Яшамоқдан бўлсин доим бир маъно,
Бир яхши ном қолсин сиздек одамдан.

Кимдир дер маслаҳат бермоқ осондир,
Муаммолар ичра ёнмоқ ёмондир,
Тушуниб етасиз бунга қачондир,
Бир яхши ном қолсин сиздек одамдан.

Қўлингизни муштлаб, тўкманг ғазабни,
Яхшилар яшайлик асраб асабни,
Ҳалол тоза яшаб, қадрлаб касбни,
Бир яхши ном қолсин сиздек одамдан.

Тўғри, режадаги ишлар ҳали кўп,
Ёрдам қўлин чўзар гоҳида дўст йўқ,
Юракни оғритманг дилга солиб чўғ,
Бир яхши ном қолсин сиздек одамдан.

Аҳад қаюм билгин дунё бевафо,
Ким нафсига қулдир, дарди бедаво,
Кўнгилга қулф османг, қилманг бенаво,
Бир яхши ном қолсин сиздек одамдан.

Аҳад Қаюм

Барча, онасини яхши кўрадиганлар учун канал

@Onalar_kanali

https://telegram.me/joinchat/TvtkE6oET_SJ2DTx