Жойнамозим Ҳар толангни гавҳар билиб, сургум кўзга, Баҳоси йў | Оналар Канали

Жойнамозим

Ҳар толангни гавҳар билиб, сургум кўзга,
Баҳоси йўқ, тенгсиз неъмат, жойнамозим.
Дил оҳимга чин сирдош йўқ сендан ўзга,
Яратгандан нурли раҳмат, жойнамозим.

Сен офтобсан жисмим кўмган зиёларга,
Тоза иймон, ҳам ёг'дирсанг риёларга,
Алишмасман сени минг бир дунёларга,
Дунёлардан қадри қиммат, жойнамозим.

Бир гул каби унсам кошки чорбоғингда,
Солиҳлардек бўлсам мудом ардоғингда,
Чин бахтни мен топдим ахир қучоғингда,
Атрофимда мўмин уммат, жойнамозим.

Қуласам гоҳ нафс чоҳига беҳуш бўлиб,
Тут илкимдан гоҳим ўнгу, гоҳ туш бўлиб,
Дил розимни етказ Ҳаққа бир қуш бўлиб,
Камолимга айла хизмат, жойнамозим.

Маҳшар кун ҳам бўл йўлимнинг сен қуёши,
Айтгил, менга теккан дея, азиз боши,
Пок бағримга томган, деб айт, томчи ёши,
Чин дўстим деб айла ҳиммат жойнамозим.

Барча, онасини яхши кўрадиганлар учун канал

@Onalar_kanali

https://telegram.me/joinchat/TvtkE6oET_SJ2DTx