2022-08-30 19:20:05
Тафаккур вақти: Мулоҳазали аёл
Оиласидаги нотинчликлардан безор бўлган бир йигит қозининг ҳузурига борибди.
– Менинг икки хотиним ва ҳар биридан уч нафрдан фарзандларим бор. Аёлларим орасида кунда-кунора келишмовчилик чиқади. Лекин бу жанжалларга қай бири кўпроқ сабабчи эканини билолмаяпман, – дебди йигит.
– Шу масалада менга ёрдам берсангиз. Улардан қай бири менга нисбатан холис ва самимий эканини қандай билиш мумкин?
Қози бу ишда йигитга ёрдам бера олишини айтиб, хотинларидан бирини маҳкамага чақирибди.
– Эринг бегона аёллардан бири билан қўлга тушди. Бу ишнинг жазоси ўлим эканини биласан. Лекин мен эрингни ўлимга ҳукм қилишдан олдин бу борада сенинг фикрингни билишни истадим. Балки унинг жазосини енгиллатиб, сургунга юборишимизни истарсан?
– Истамайман, – деди хотин қатъий. – Менга хиёнат қилганни асло кечирмайман. Дорга остиринг, ипини ўзим тортаман.
Хотин қози ҳузуридан чиқиб кетгач, иккинчи хотин ҳам чақирилиб, худди шу масалада унинг фикри ҳам сўралди.
Шунда аёл:
– Қози жаноблари, мен эрсиз ҳам яшай оламан. Лекин норасида болаларга зулм бўлиб қолмасин, десангиз, уни сургунга юборинг. Тирик бўлса, фарзандлари бағрига бир кун қайтиб келади, – деди.
Қози ҳар икки аёлнинг гапини йигитга билдирибди. Йигит эса, энди қайси хотинга қандай муомала қилишни билиб олибди.
Телеграм каналимизга аъзо бўлинг ва дўстларга улашинг: https://t.me/ogohuzofficial
7.4K views16:20