2022-04-06 09:17:40
Hamma narsa uchun motivatsiya qidiradigan bo'lib qoldik. Til o'rganishni boshlash uchun motivatsiya, sport bilan shugʻullanish uchun motivatsiya, biznes boshlash uchun motivatsiya, yaxshi yashash uchun motivatsiya, yoki hammasining boshi : ketimizni divandan ko'tarish uchun ham biror motivatsiya olishimiz kerak.
Motivatsiya va hattoki unga qo'shib bilim va ko'nikmani taklif qilayotgan, aniqrog'i shunga da'vo qilayotgan har xil qalloblarning, info lo'lilarning biznes treninglari, loyihalari, seminarlari ham, ularga ergashuvchilar ham bemaza qovunning urug'iday ko'payib ketdi. Qayoqqa qarama nimadir sohada yetakchi, spiker, psevdopsixolog... Lox birinchi paydo bo'lganmi yoki mashennikmi desa, bemalol lox deyish mumkin, chunki ko'pincha taklif talabga qarab paydo bo'ladi.
Bunaqa kitoblarni, bloglarni shunchaki bir ma'lumot o'rnida o'qib ko'rsak bir navi, lekin ularga ishonsak va o'rganib qolsak oxiri borib boshi berk ko'chaga kirib qolamiz. Shu tipdagi ma'ruzalarning mag'zini tashkil qiladigan jumlalar, "har kuni oynaga qarab men baxtliman deb ayting", "sizning ichingizda bitmas - tuganmas energiya bor ", "siz barini uddalaysiz", "boshqalarga o'xshamang, siz tanlangansiz" kabilar yolg'on.
Siz tanlangansiz, boshqalardan farqlisiz deydiganlar quloqqa lag'mon osyapti, hozir o'sha boshqalar ham sizga o'xshamasligini, tanlanganligini o'qib turgan bo'lishi mumkin.
Har doim yaxshi kayfiyatda yurish ilojsiz narsa, har bir tuyg'uning kayfiyatning o'z o'rni bor. O'rni kelsa yig'lashimiz, siqilishimiz kerak. Barcha ishni uddalab ham bo'lmaydi. Energiyangiz ham bitmas - tuganmas emas. Bu dunyo baxtlar-dardlar, quvonchlar - qayg'ular, uchrashuvlar-ayriliqlar, g'alabalar - mag'lubiyatlar dunyosi. Ba'zida yengilishimiz, taqdirga tan berishimiz, xotirjam qabul qilishimiz kerak bo'lgan vaziyatlar bo'ladi.
Optimistik ruhdagi narsalardan ko'ra pissimistik xarakterdagi adabiyotlar hayotni yaxshilaydi. Chunki unda osmonlarda uchib yurmasdan oldinda nima kutib turganini bilasiz, eshik ortida jarlik borligini oldindan bilgan odam uni ko'rib shokka tushib qolmaydi, shunga tayyor edi u, yo boshqa yo'lini qidiradi, yo xotirjam qabul qiladi.
Pozitiv, motivatsion narsalarni o'qiyotganingizda xuddi u sizni o'zgartirayotganday, kuchingiz ichingizga sig'may ketayotganday , hayotingiz yaxshilanib qolayotganday tuyuladi. Lekin bu vaqtinchalik illuziya. Tayyor xulosa hech narsa bermaydi hech qachon. Insonni voqealar, sinovlar, o'zi chiqargan xulosalar, anglagan narsalari harakatga keltiradi.
"Biz kutgandik, biz bilgandik" chi qiz Nozim Safari bilan suhbatida bir gap aytgandi : "men gapirar ekanman, odamlar qarsak chalardi, jo'shib ketardi, demak to'g'ri gapirayotgan ekanman deb yana davom etardim". Sizga motivatsiya beradigan kitoblar, insonlar bilan ham munosabatingiz shunday, o'sha lahzada hammasi yaxshiday, hammasi zo'rday avjiga chiqasiz, aslida tagi puch bo'ladi.
Xullas, motivatsiyalarga ishonib yuradigan odamlar bir kun qiyinchilik oldida butunlay sinib qoladilar. Nimanidir eplolmaganlaridan keyin qayta tiklolmaydilar o'zlarini. Inson o'zining imkoniyatlarini, bu hayotdagi jirkanchliklarni, mazmunsizlikni, absurdni anglashi kerak. Chunki hayotda shunday vaziyatlar bo'ladiki, odamni u paytda falsafiy fikrlar emas, instinklar boshqaradi. Hayot uchun xavfli vaziyatlarda o'sha vaziyatdan ko'ra ichingizdagi qo'rquv bilan ko'proq olishasiz. Shunaqa vaziyatlar, qo'rquvlar ko'pligini bilsangiz uni yengishingiz, ma'lum muddat peshonaga yozilganni xotirjam qabul qilish mumkin. Donishmand Sizif kabi. O'ziga berilgan jazoni oddiy qabul qilish orqali jazoning jazolik mohiyatini yo'qqa chiqaradi. Biz doim pozitiv kayfiyatda yurishimiz, nimalarnidir o'rganishimiz, nimalarnidir qoyillatishimiz, dunyoni ostin - ustun qilishimiz, o'zimizni tanitishimiz shart emas. Tashqi turtkilarga emas, ichki dunyoyingizga boqing, ruhan xotirjamlashing. Qolgani bir gap bo'lar. Hamma narsaga kuyib - pishma ko'nglim , na bu dardlar qoladi, na bu umr , deydi Rumiy.
Salimov
@odilovkundaligi
307 views06:17