RAVZAI NAZM

2020-06-18 14:56:11 Кўнгилга сиғмас қилни
Мен қирққа ёргим келар,
Қалдирғоч қанотида
Ёнингга боргим келар.

Йиллар мени етаклар,
Етолмасман ёнингга,
Жонимни қўшиб қўйгум,
Гулим, сенинг жонингга.

Дўланани дўл урса,
Тоғлар боши ёрилмас,
Қайрилиб камон бўлди,
Бевафо ёр қайрилмас.

Қўлларингни бўйнимга
Кел, бир бор сол, жоним,
Майли кейин бу жонни
Остонангда ол, жоним.

Маҳмуд Тоир

Аҳаджон Одилов

@nazmiy Ochish/sharhlash

2020-06-18 14:41:23 Сен бахтлисан, мовий ҳавога
Сачратиб юр кулгининг рангин!
Сен кулмасанг енди дунёда
Кимдир, кимдир яшайди ғамгин!

Шавкат Раҳмон

@nazmiy Ochish/sharhlash

2020-06-18 11:43:53 Оиша розияллоҳу анҳодан ривоят қилинади:

«Расулуллоҳ соллаллоҳу алайҳи васаллам:
«Мен сенинг мендан розилигингни ҳам, аччиғинг чиқиб турганини ҳам биламан», - дедилар.
«Қандай қилиб бунибиласиз, эй Аллоҳнинг Расули!?» дедим.
«Агар сен рози бўлсанг, гапингнинг орасида «Худди шундай, Муҳаммаднинг Роббиси ила қасам!» дейсан. Агар аччиғинг чиқиб турган бўлса: «Йўқ, Иброҳимнинг Роббиси ила қасам!» дейсан», дедилар.
«Тўғри! Фақат исмингизнигина ҳижрон қиламан», дедим».

Шарҳ: Бу ҳадиси шарифдан Расулуллоҳ соллаллоҳу алайҳи васаллам билан У зотнинг энг яхши кўрган аёллари Оиша онамиз розияллоҳу анҳонинг ораларидаги қалб сирига боғлиқ дақиқ муносабатларни билиб оламиз.

Бу жуда нозик масала. Буюк зотлар ўтасида уришиш, аразлашиб қолиш ҳолатлари бўлмаган. Ўзгариш жуда ҳам сезиш қийин бўлган нарсада, фақат гапда бор.

Расулуллоҳ соллаллоҳу алайҳи васаллам шу нарсанинг ҳам мулоҳазасига борган эканлар, Оиша онамиз розияллоҳу анҳо ҳам бунинг жуда дақиқ маъносини тушунтириб берган эканлар.

@nazmiy Ochish/sharhlash

2020-06-17 13:50:12 Таниш терак. Ариқ ёқаси.

Бўтана сув, ширин лойқа сув.

Тол кўчада отлар тақаси,

Қанча бўлди кўрмаганимга…



Ялпиз ҳиди тутган далалар,

Гапга чечан боқчахолалар,

Беланчакда ётган болалар,

Қанча бўлди кўрмаганимга.



Тоғ ортидан мўралаган кун,

Шийпонлардан ўрлаган тутун,

Тут шохига осилган тугун…

Қанча бўлди кўрмаганимга.



Ўқариқдан ёлғизоёқ йўл,

Менга илҳақ, менга муштоқ йўл,

О, қадрдон бир жуфт қадоққўл,

Қанча бўлди кўрмаганимга.



Ёғоч эшик очилар секин,

Тошмеҳрман мен жуда, лекин

Ҳозир йиғлаворишим мумкин –

Қанча бўлди кўрмаганимга…


Мухаммад Юсуф

Абдукарим Мирзаев

@nazmiy Ochish/sharhlash

2020-06-16 13:12:14 Жонимдан тўйганман, ҳаётдан панд еб,
Ким сўз очса, қалбим ярасин очар.
Агар ўлиб кетсам ўксимагин, деб
Ўлиб кетай агар, юрибман ночор.

Кўрган куним қурсин, кунимни кўрдим,
Юзлаб юзсизларга бўлдим юзма-юз.
Худо урганларга ўзимни урдим,
Йўлдан урган билан кетдим изма-из.

Азизам, ўзинг айт, бедилда не дил?
Ўт-ўлан ичра ўт ичрадир ўлан.
Азизам, эгилсанг осмонга эгил,
Суҳбат қур кўнглини қурганлар билан.

Кимга керагим бор? Яшашга йўқ эп…
Қўлсиз, оёқсиз ғам юрагим очар.
Агар ўлиб кетсам хафа бўлма, деб
Ўлиб кетай агар, юрибман ночор.

Иқбол Мирзо

@nazmiy Ochish/sharhlash

2020-06-16 12:40:37 "Ақл Ҳаж қилиш учун туя топгунча,
Муҳаббат Каъбани бир марта айланиб чиқади... "

Мавлоно Румий

@nazmiy Ochish/sharhlash

2020-06-16 12:11:52 "Аразда ҳам севги яшар..."

(Қўшиқдан)

@nazmiy Ochish/sharhlash

2020-06-16 10:25:24 Сочингда қасдинг бормиди, жонон, кeсибсан остидан,
Тупроққа кeтди тўлғониб ғаддор қайчининг дастидан.
Eрларча тeкислаб уни, рўмол юлинди устидан,
Нозик бeлинг бўлди жудо қирқта ҳақиқий дўстидан,
Соч ўрнида энди ўзим, бошингда дастёринг бўлай,
Боринг бўлай, йўғинг бўлай, ёнингдаги ёринг бўлай.

@nazmiy Ochish/sharhlash

2020-06-10 12:42:37 Боғим кетди — қолган кўнглим ёбони,
Олдида қум, ортидадир довони,
Келаётган ўзгаларнинг даврони —
Тўхта-я, тўхтагин, умрим карвони.

Ғам селини тун-кун кечиб ўтдинг сен,
Кишанларни узиб, ечиб ўтдинг сен,
Кўз ёшларни ичиб-ичиб ўтдинг сен —
Тўхта-я, тўхтагин, умрим карвони.

Орзулар ўтларда ёниб кетдилар,
Шамоллар кулларни олиб кетдилар —
Ҳатто куллари ҳам ғолиб кетдилар —
Тўхта-я, тўхтагин, умрим карвони.

Кетган — офтоб, қолган — митти чироқдир,
Чироқни пуфлаган мастон фироқдир,
Осмонга қарадим — осмон фироқдир —
Тўхта-я, тўхтагин, умрим карвони.

Вақт шоҳ бўлса, Оллоҳнинг йўқ қўмаги,
Тебраниб-тебраниб толди юрагим,
Ҳар босганинг — жонимнинг бир бўлаги —
Тўхта-я, тўхтагин, умрим карвони.

Бир ўжар, довулда учиб қоляпман,
Туянгдан сирғаниб тушиб қоляпман.
Йўлингда қумларни қучиб қоляпман,—
Тўхта-я, тўхтагин, умрим карвони.

Жонимни бунча тез фидолар қилдим,
Гарчи эшитмайсан — дуолар қилдим,
Ортингдан эмраниб садолар қилдим:
— Тўхта-я, тўхтагин, умрим карвони.

О, бекор шаън ўйлар суриб боряпсан,
Билмайсан, қайларга юриб боряпсан,
Боряпсан — тупроққа кириб боряпсан —
Тўхта-я, тўҳтагин, умрим карвони.

Усмон Азим

@nazmiy Ochish/sharhlash

2020-06-10 12:35:58 Тонг титрайди кеч кузакнинг қучоғида,
Юлдузларни ўчирмоқда гулгун шафақ.
Жоним, қалбим шеъриятнинг пичоғида...
Замин — тилсим, осмон — тилсим... шеър — бешафқат!

Мен қийналдим. Хаёлимнинг қанотида
Денгизларни кўтарганча толиб учдим.
Юлдузларни кўп кўрганман ҳаётимда,
Денгиздаги юлдузларни келди қучгим.

Кўкка боқдим, ўт туташди жоним аро...
Қат-қат булут қатларида не сир-асрор!
Ҳайрат ичра ўлдиргуси мени само,
Она замин, уча қолай, қўйиб юбор!

Мен ёр дедим.. Лайлими ё, Ширинми ё!
Ёки энди туғилажак бирор малак?
Мана, мен, деб кўз олдимда бўлди пайдо,
Мана, мен, деб шеърдан боқди якто юрак.

Юлдузларни ўчирмоқда гулгун шафақ,
Тонг титрайди кеч кузакнинг қучоғида,
Шеър ёзилар... Қийноқ, сенга бўлсин шараф,
Жоним, қалбим шеъриятнинг пичоғида...

Ҳали бутун рўйи жаҳон шеър бўлажак,
Фақат бекор билиб ором қучоғини —
Бу дунёни сирга кўмиб яшаш керак,
Қалбга санчиб шеъриятнинг пичоғини!

Усмон Азим

@nazmiy Ochish/sharhlash