Нима учун турнирда «Насаф» йўқ? Биз таклиф қилдик. Менимча мол | Nadirkhuja Yuldashev

Нима учун турнирда «Насаф» йўқ? Биз таклиф қилдик. Менимча молиявий ҳолат туфайли.

Нима учун «Бунёдкор» йўқ? Мураббий Хвостунов истади, аммо таркиб шакллантиришда муаммо бўлди.

«Пахтакор» қани? 5 нафар асосий таркиб ўйинчисида шамоллаш ёки жароҳат.

Мана нима учун булар йўқ. Бу турнирга барча яхши жамоаларни саралаб чақирдик. Келиш, келмаслик ихтиёри уларда. Шунинг учун илтимос, билиб билмай фикр берманглар.

Агар танлаш керак бўлса, клубни танлайман. Истаган киши жойимга ассоциацияга келиши мумкин. Шу ишни қиламан деса, марҳамат, жой бўш.

«Автограф+» орқали ОАВга қайтаман. 3та лойиҳам бор, шуларни кетма-кетликда тасвирга олиб юраман. Бу ҳам катта вақтни олади, менимча энди ўзимни ассоциацияга вақтим бўлмайди. Инсонни ёши ўтгач, тирикчилик биринчи ўринга чиқади. Оддий ходим бўлиб ишни давом эттиришим мумкин, раҳбарлик қилмайман. Анча ўйладим, гап сўзларни юракка яқин оладиган одатим бор. Қўл силтай олмайман. Шунга мавсумни чиройли якунлаб олай, бўлди. Олдимизда фақат U-18 мусобақасининг финали қолди. Рожер деган мутахассис келиб бу турнирни ПФЛ ўтказмаслиги керак дебди. Шаҳарда у айтган тизимни 3 йил аввал йўлга қўйгандим. Кучли жамоалар ҳар қандай ҳолатда ҳам кучли лигада ўйнаши кераклигини айтибди. 3 йил аввал шу тизимга келдик.

«Кеча, Бугун, Эртага», «Бир ўйин тарихи», «Автограф+» асосий лойиҳаларим бўлади энди.

Табиийки, клуб ҳам. Ишонинг, футболни бузаётган киши мен эмас. Мен билан яқиндан танишинг, гап сўзларга ишонмай ҳар-хил.

Анча мунча истеъдодларни кўряпман. Имконияти жуда паст. Ачиниб кетяпман. Ёрдам берай десам, қўлим узун эмас. Мана шунақа қишлоқдаги ўсмирлар учун лойиҳа ўйлаяпман. Бола, ота-онаси тузук нарса емаётганлигини билиб сиқилмаслиги керак. Рўйхатим узун. Қўлимдан келса сайт орқали нимадир ўйлаб амалга ошираман. Кўпчиликсиз амаллай олмайман. Бу шоу эмас, бир жуфт бутсани икки киши кийишини кўриш ачинарли.

Аслида қилишимиз керак бўлган ишлар сероб. 2021 йилни вилоятларда турнир ўтказишга сарфлайман. Манаман деган жамоалар Наманганга маблағ туфайли кела олмади. Сабаби 11х11га ўтгач жамоалар қийналади. Энди 11 ўйинчидан ташқари яна 6-7 нафар захира ҳам олиб кетиш керак бўлади. Камига бола 13-14га киргач ота ва оналардаги аввалги шашт қолмайди. Бу ёзилмаган қонун, «мураббийинг олиб кетса боравер, пул йўқ», мана шу жавоблар оддий ҳолга айланади. Натижада на турнир, на бошқаси бор. Бизни клубни фойдаси, Тўрақўрғонда ўз базамизга эга бўлганимиз. Бу жуда муҳим. Энди вилоят жамоаларини тасаввур қилаверинг. Шунинг учун биз у ерга борайлик ва сафарга чиқишга қийналадиганлар учун шароит яратайлик. Шу 2021 йилдаги асосий мақсад бўлади.

Худо хоҳласа 3-4 йилдан кейин меҳнатим мевасини кўрасизлар. Унгача ҳаётда ким бор, ким йўқ, ёлғиз эгамга аён!

Раҳмат.