2022-12-27 15:33:01
Sening koʻzlaringda koʻtarilgan shovqin
(shamol bosqinchidek talaydi bogʻlarni)
mening koʻzlarimda tirilgan isyon
(yomgʻir tashlab ketar shalabbo kunni)
yoki barmogʻingda oʻynayotgan nur
(mudraydi almisoqni koʻrgan oy)
yoki barmogʻimni kuydirgan tuygʻu
(quyosh tutiladi qovurgʻam ostida)
hammasi birlashar
soʻzlarni tartiblab terasan taqvimga
(xonang nafas olar jonim she’r - nafas)
soʻzlarni eshaman sugʻuraman taqvimdan
(baribir seniki boʻlmaydi ular)
xonangni tutadi soʻz isi she’r isi
(tuygʻular tirikdir)
men azaldan abadga tomon oʻqiyman
(ruhim - soʻz, ruhim - she’r
dunyoni tutadi koʻnglimning isi)
soʻzlar birlashar
kel
safaring - gullarning mavludi
(anglanmagan ranglar tirilar yoʻllarda)
boraman
safarim...
men telba musofir
(axir men ranglardan iborat!)
va sening safaring buyuk koʻchishdir
(dengizlar toʻqnashar,
oʻsadi togʻlar)
va mening safarim sen tomon qochishdir
(koʻz yoshiga choʻkmay musichalarning)
bu yoʻllar birlashar
Bashorat Otajonova
53 views12:33