Анчадан бери вконтакте иловасидан фойдаланмай келаётган эдим. | Mulkdor

Анчадан бери вконтакте иловасидан фойдаланмай келаётган эдим. Бугун вконтактега кириб ушбу эски постга кўзим тушди. Ичимдаги дард яна янгиланди.

Журналист касбидагилар асосан ойлик маошга ишлашади. Уларнинг раҳбарлари ёки эгалари берилган вазифага қараб ҳақ тўлашади. Бу соҳадагиларнинг кўпчилиги оғир, жисмоний меҳнатдан қочади. Тадбиркорлик, ишбилармонлик буларга ёд нарса. Уларга тўланаётган пулнинг қаерда ва қандай ишлаб топилганининг қизиғи йўқ. Муҳими кўпроқ пул тўлашса бўлди.

Мен ишбилармон ва тадбиркорман. Пулни ақлий ва жисмоний меҳнатим орқали ишлаб топаман. Ҳар бир чақа мен учун қадрли. 1999 йилда “КЕШ” очиқ акциядорлик жамиятига қарашли акцияларни 60,5%ни Тошкент фонд биржасидан ўз билимим, иқтидоримга таяниб, ўзим ишлаб топган пулимга сотиб олишим ва бунинг ортидан шу акциядорлик жамиятига пора бермасдан раҳбарлик курсисига ўтиришим мени бир катта ютуғим эди. “КЕШ” очиқ акциядорлик жамияти чорвачиликка ихтисослашган катта агрокомплекс эди. Ҳатто шу агрокомплексни ичида асаларичилик, балиқчилик, боғбончилик ва узумчиликдан иборат тўртта фермерлик хўжалиги мавжуд эди.

Йиллар давомида Озодлик, Америка овози, ББСўзбек радиолари мени ҳар доим фермер деб келишди. Мен бир неча бор бу радиолар журналистларига мени ҳақимдаги маълумотларни тўғри беришни талаб қилиб келдим, аммо бу оддий талабим амалга ошмай келди.

2018 йилда мен АҚШ юртдошлигини қабул қилдим ва исмимни Баҳодир Хон Туркистонга ўзгартирдим.

Мен ўзимни мухолифатдаги Бирдамлик Халқ Демократик партиясининг етакчиси, собиқ Мулкдор, собиқ “КЕШ” очиқ акциядорлик жамиятининг раҳбари Баҳодир Хон Туркистон деб таништираман.