2022-09-25 18:12:51
* * *
"Sizni...
bir qiz yaxshi ko'radi,
Kimligini aytmayman lekin.
Befarqligi dunyoday yolg'on--
Muhabbati o'lim kabi chin!"
Xating hayrat oshirdi haddan,
Kim deb so'rdim--
xayollar epkin...
"Sizni juda-juda sevadi,
Kimligini aytmayman lekin!"
Xayolimda chizdim suratin:
Ming bitta qiz,
barisi bo'lak...
Yana deyman:
qayrilma qoshi,
Sochi qora bo'lishi kerak.
Har kun sariq sochlaring o'ynab,
O'tar eding,
qomating durkun...
O'sha so'zni aytarding qiynab,
kimligini aytmasding lekin.
Yuragimga oq bayroq ilib,
Ko'chalarda kezdim darbadar.
Sochga oqdan xabar keldi-yu
Lek u qizdan bo‘lmadi xabar.
Bir kun menga yubording to‘yxat,
"Keling... menga baxtlar tilang oq...
O‘sha telba qiz o‘zim edim--
Qiyinmidi shunchalar sezmoq?!"
Qayrilma qosh bo‘lmasang ham, o!
Garchi soching emas tunday tim.
Befarqligim dunyoday yolg‘on--
O‘lim kabi chin muhabbatim.
Rashid Xo‘jamov
41 viewsNargiza Mamarajabova, 15:12