2021-12-12 21:18:02
ОНАМНИ КЎРГАНИ БОРАМАН Бозорга чиқибди қулупнай,
Етказди, Худодан айланай,
Илиниб, илиниб олволай,
Онамни кўргани бораман.
Ишларим йўлимни тўсса ҳам,
Пойимда тиканлар ўсса ҳам,
Бир даста гул олиб бўлса ҳам,
Онамни кўргани бораман.
Кирсам ҳам иккита нон билан,
Бағрига босади жон билан,
Айтади: "кедингми, жон болам?"
Онамни кўргани бораман.
Бўлиниб, ҳар ким ўз йўлига,
Ташладик келинлар қўлига,
Ялиниб яшар ўз ўғлига,
Онамни кўргани бораман.
Кийиниб, оҳорли, саришта,
Бормайин эски, чанг ковушда
Сўзлайин энг майин товушда
Онамни кўргани бораман.
Ичволиб, маст бўлиб бормайин,
Ҳайвондан паст бўлиб бормайин,
Хит қилиб юрагин ёрмайин,
Онамни кўргани бораман.
Ичига солиб ғам-ғуссасин,
Туққанига афсус емасин,
"Ўлсанг ҳам розиман!" демасин,
Онамни кўргани бораман.
Куйдирги фарзандин доғида,
Синмасин қариган чоғида,
Эъзозлай жонининг соғида,
Онамни кўргани бораман.
Ўтирай бемалол, ёзилиб,
Қолмасин ташвишим сезилиб,
Юрмасин юраги эзилиб,
Онамни кўргани бораман.
Айтмайин боламнинг ғамини,
Билдирмай рўзгорим камини,
Ўчирмай юрагин шаъмини,
Онамни кўргани бораман.
Акамнинг яхшисин оширай,
Укамнинг айбини яширай,
Қувнатиб меҳрини тоширай,
Онамни кўргани бораман.
Уй талаш-мол талаш қилмайин,
"Унга кўп, менга оз", демайин,
Бошини оғритиб келмайин,
Онамни кўргани бораман.
Эркалай: «Оймомам, ўзимни,
Қувнатиб турасиз кўзимни»,
Кулади эшитиб сўзимни,
Онамни кўргани бораман.
«Ҳаммадан гўзалсиз», деб атай,
Сўлиган руҳини яшнатай,
Кулдириб-кулдириб, яйратай,
Онамни кўргани бораман.
Нурланиб қайтаман ёнидан,
Куч олиб жисмию жонидан.
Кузатар кулиб, айвонидан,
Онамни кўргани бораман.
Ўшадир, Марҳабо, давлатим.
Энг гўзал фарзим-у суннатим,
Оёғин остида жаннатим,
Онамни кўргани бораман.
Марҳабо Каримова
P.S.: Дам олиш кунидан унумли фойдаланиб, оналаримиз ҳолидан хабар оламиз!
Оқибат учун ушбу шеърни улашамиз!
Нишонига тегадиган гаплар фақат бизда: @nishondagi_gaplar_tegadi
2.7K views𝙾𝚢𝚊𝚝𝚞𝚕𝚕𝚘 𝚘𝚏𝚏𝚒𝚌𝚒𝚊𝚕, 18:18
M
