2022-12-22 08:25:44
Aka, singil va yanga
Juda ta'sirli she'r ekan, qayta-qayta o‘qidim
Garchi zamon mumsiqroq,
Olam juda tor edi.
Bir onadan tugʻishgan
Aka-singil bor edi.
Qoʻl uchida kun koʻrib
Yashar edi akasi.
Uzatilgan singil ham
Oʻzga uyning bekasi.
Besh bolaning hammasi
Murgʻak edi, yosh edi.
Shuning uchun akaning
Chaynagani tosh edi.
Tinmas edi kunu tun
Yelkalari xoʻp yagʻir.
Oʻshanday bir zamonda
Savdo tushdi koʻp ogʻir.
Xabar keldi tilponda
Singil yotib qolibdi.
Chorasizmish, kuyovi
Gʻamga botib qolibdi.
Aka, yanga shu onda
Yugurdilar, yeldilar.
Singillarin uyiga
Tong saharda keldilar.
Singil shoʻrlik bir axvol
Yotar edi qaltirab.
Qavatida qizchasi
Oʻtirardi moʻltirab.
Kuyov qurgur, qarangki,
Na bir chora etibdi.
Xabar bergach akaga,
Shoshib ishga ketibdi.
“Qaratamiz,- dedi yanga,-
Olib boring doʻxtirga.
Xafa boʻlmang kuyovdan
Uning vaqti yoʻqtir-da”.
Eltdilar va topdilar
Doktorlarning zoʻrini.
Tugatdilar bir kunda
Topgan qutu qoʻrini.
Doktor aytgan dorilar
Topilarmish Moskopdan.
Aka shoʻrlik holi tang
Koʻzi tindi hisobdan.
“Turing,– dedi xotini,–
Nega toshday qotasiz?
Ana qoʻylar, gʻam yemang,
Bozor kuni sotasiz”.
Qoʻylar bari sotildi
Qoʻra qoldi huvillab.
Pulning esi yoʻq ekan,
Ketaverdi shuvillab.
Hafta oʻtmay doktorlar
“Yangi dori” dedilar.
“Bu kasalning yagona
Shudir kori” dedilar.
Qotib qoldi koʻzlari
Bir nuqtaga tikildi.
Aka shoʻrlik holi tang
Yelkalari bukildi.
Shu turishda uning-chun
Dunyo oʻzi dor edi.
Oʻn erkakcha himmatli,
Lekin yori bor edi.
“ Yalinmang hech kimsaga
Qaydan qayga chopasiz.
Omon boʻlsa boshingiz
Bir kun barin topasiz.
Soting,– dedi,– ana siz,
Yolgʻizgina sigirni.
Paygʻambarlar siylagan
Axir, mungli sagʻirni.
Tosh ostida emasdir
Biling, ikki qoʻlingiz.
Siylasangiz singilni
Xudo berar yoʻlingiz”.
Sigirni ham sotdilar
Xarj qildilar bemalol.
Ammo singil kundan kun
Soʻlib borar bemajol.
Doktor dedi:”Ogʻir dard,
Umid faqat xudodir”.
Yanga dedi:”Kurashgum,
Oʻnta jonim fidodir”.
Yana dedi:”Ayting siz,
Bunga shifo bor qayda?”
Doktor dedi:”Chorasi
Yapon degan bir joyda.
Ikki buyrak qurigan,
Shuning uchun koʻp behol.
Oʻsha yoqqa eltsangiz,
Yashab ketar ehtimol.
Eltmoq, lekin u yoqqa
Juda qimmat boʻlarmish...”
Inson uchun zoʻr boylik
Biling, himmat boʻlarmish.
Qanday kuch bor ayolda
Yolgʻiz xudo biladi.
Bel boylasa dunyoni
Ostin-ustun qiladi.
Doktor soʻzi akani
Bir soniyada oʻldirdi.
Yanga uni bir siltab
Soʻng oʻziga keltirdi.
“Bu dard bilan qasdma-qasd
Kim yengarga oʻynayman.
Singlingizni endi men
Tuzatmasdan qoʻymayman.
Soting,– dedi,– hovlini,
Bir kunimiz koʻramiz.
Bollar katta boʻlguncha
Ijarada turamiz.
Dunyoning bir qavati
Bizga oʻxshash odamdir.
Tashvish qilmang har nedan,
Rizq berguvchi egamdir.
Nomusingiz – singlingiz,
Yashaysizmi hech orsiz?
Biz koʻnamiz har nega
Boshimizda Siz borsiz”.
Koʻzlarida oʻt chaqnab,
Gapni shunday doʻndirdi.
Hushsiz, holsiz erini
Uy sotishga koʻndirdi.
Ota hovli sotildi
Har tomonga chopdilar.
Izlay-izlay oxiri
Ijara uy topdilar.
Yanga qoldi bollarin
Oʻrab eski choponga.
Aka esa singilni
Olib ketdi Yaponga.
Uch oy oʻtib oradan
Gul-gul yashnab qaytdilar.
Shifo bergan tangriga
Shukronalar aytdilar.
Soʻrasangiz oxirin
“Nima boʻldi, ne etdi?”
Bir kun koʻrdim akani
Minib oʻtdi “Lasetti”.
Oʻsha yanga omondir,
Yashaydi shu zamonda.
Yoningizda, siz yoqda,
Yoki bizlar tomonda.
Ey akalar, demangiz:
“Bu shunchaki hikoyat”.
Oʻylab koʻring, sizda ham
Bormi shunday shijoat.
Akalarning qalbiga
Mehr doim yor boʻlsin.
Singillarning baxtiga,
Mard yangalar bor boʻlsin!
@Farzand_tarbiyasi_uzb
10 viewsKrutoy krasavchik , 05:25
![Telegram kanalining logotibi mmaazzaammii006 — X[̲̅u̲̅][̲̅l̲̅][̲̅i̲̅][̲̅g̲̅][̲̅a̲̅][̲̅n̲̅][̲̅i̲̅][̲̅s̲̅][̲̅t̲̅][̲̅a̲̅][̲̅n̲̅]](https://logos.telegram-store.com/channels/mmaazzaammii006/telegram_logo.jpg){kind=logo}
X
