Иккимиз ишқ дея ҳар кўйга тушдик, гоҳо ловулладик, гоҳо музл | Nodirabegim.uz

Иккимиз ишқ дея ҳар кўйга тушдик,
гоҳо ловулладик,
гоҳо музладик.
Яшиндай тез ўтган баҳор ортидан
хазонрез боғларда узоқ кузладик.

Оламни унутдик,
еру самони
ораси бир қадам бўлди биз учун.
Телбага айландик мастлик қўйнида
ишқ майи ахийри кўрсатди кучин.

На сен эсли эдинг,
ва на мен оқил,
боши берк кўчага югуриб кетдик.
Саробга интилиб алал оқибат
манзилга етмайин бир ерга етдик.

Узанган қўлимиз муаллақ қолди
олис масофанинг ўрталиғида.
Бошдан ҳушимизни битта ишқ олди,
ўттизу қирқ ёшнинг оралиғида.

Оний лаҳзалардан битта бахт излаб,
бахтни бир айланиб қучганимиз йўқ.
Ишқ дея ҳар кўйга тушдигу фақат
ёнма-ён суратга тушганимиз йўқ.

Орифжон Комил

@mittihaqiqatlar