Келажак келмади, кеча кетмади, Бугуннинг ўлимга етмас тоқати. | Mitti qush

Келажак келмади, кеча кетмади,
Бугуннинг ўлимга етмас тоқати.
Орзулар рўёбга бориб етмади,
Умидлар оёққа кишан тақади.
Зерикдим шунчаки кутиш залида
Алдаган меҳмоннинг пойлаб оёғин.
Бошим-чи янчилар ўйнинг келида,
Уваблар ташладим сабрнинг тоғин.
Кунботар томонга отдим кўзимни,
Ўзим ботиб кетдим қуёшдан олдин.
Ичга ютавериб айтар сўзимни,
Тили бор соқовга айландим-қолдим.
Ёлғоy-яшиқларинг жон олди тамом,
(Жоним сенда экан, қулманми, ахир?!)
Қуруқ ваъдаларинг этаркан давом,
Ҳаётим давоми тахирдан-тахир.
Келмасанг, кетаман олисга шошиб,
Сени кутиш учун умрим жуда оз.
Мен-ку узоқларга кетарман қочиб.
Куйгайман бошқалар алданса, холос.