#ШЕЪРИЯТ ЙЎЛОВЧИ Қирқ санадир ҳаммамиз бир кемада, На уммо | Media Group

#ШЕЪРИЯТ

ЙЎЛОВЧИ

Қирқ санадир ҳаммамиз бир кемада,
На уммон ўзгарди, на биз ўзгардик.
Тузли сув ичамиз, балиқ емакда,
На даврон ўзгарди, на биз ўзгардик.

Очкўзимиз қора қозон бошида,
Дўст юз ёшда, душман юз ўн ёшида,
Азияту, исканжанинг ташида,
На макон ўзгарди, на биз ўзгардик.

Эшкак аҳмоқ қўлда, рулдачи аъмо,
Кема ёқилғиси жанжал ва иғво,
Мувозанат бузуқ, кўнгиллар расво -
На қурбон ўзгарди, на биз ўзгардик.

Капитан сархушдир, елкан ўн бўлим,
Компас тўғримикан?! У ҳам номаълум,
Қуруқликдан сувга тушдик, ҳол мавҳум,
На шайтон ўзгарди, на биз ўзгардик.

Сабримиз тугади, салвон қолмади,
Маслаҳатчи кўпку, ишчан қолмади,
Қўлимизда қилич-қалқон қолмади,
На қалқон ўзгарди, на биз ўзгардик.

Қуюқ туман қоплади, босди фалокат,
Кўз кўзга тушмаса қилди ҳиёнат,
Бурчакда бемажол, етим ҳақиқат,
На бўрон ўзгарди, на биз ўзгардик.

Уч-беш сўм пул учун хоинни мақтаб,
Мазлумни калака қилар атайлаб,
Сохта обрўсини асраб, авайлаб,
На фармон ўзгарди, на биз ўзгардик.

Маҳбубий иймонинг омонат қилма,
Номардга аҳволинг шикоят қилма!
Ҳамма ўзгарса ҳам, лек сен ўзгарма!
На виждон ўзгарди, на биз ўзгардик.

(Абдурроҳим Каракўчдан ўзлаштирма)

Маҳбубий

@Media_Group