Media24.uz

2023-04-11 12:38:19 Айтган сўзи учун қамалган блогер

Активист лойиҳаси асосчиси Ҳожиакбар Носиров 15 суткага қамалганди. Унинг адвокати мижози билан учрашолмаётгани ҳақида аудио эълон қилган.

Суд қарорига кўра, у диний адоват уйғотувчи видео жойлаган. Лекин унинг "ҳаром ё ҳалол" деб айтган сўзи учун қамалиши бироз мантиқсиздек. Қолаверса, унинг бу видеосини кўпчилик кўрди, кўпчилик йўқ, яъни ихтилоф чиқишга ҳам улгурмади.

Ички ишлар вазири матбуот котиби Шоҳруҳ Ғиёсовнинг айтишича, Носиров жазо муддатини ўтамоқда ва қоидага кўра, жазони ўтаётган шахсни Тошкент шаҳар ИИББга олиб бориш мумкин.

Адвокати билан учраштирмаётгани ҳақидаги саволга эса "тўсқинлик бўлса, шикоят қилиши ҳам мумкин", дея жавоб берган. Аммо кимга арз қилиш кераклиги очиқланмаган.

2020 йил декабрда одамларни туҳмат ва ҳақорат учун қамаб ташлаш жазоси бекор қилинганди.

@media24uz Ochish/sharhlash

2023-04-11 09:29:54 Энди импорт товарларни ҳам кредитга олиш мумкин

Энди чет элда ишлаб чиқарилган товарларга ҳам истеъмол кредити берилади. Президент имзолаган “Истеъмол кредити тўғрисида”ги қонунга ўзгартиш ҳақидаги қонун матни бугун "Халқ сўз" газетасида эълон қилинган.

Унга кўра, молиявий истеъмол кредити бериш истеъмол товарларини (хизматларни) ишлаб чиқарувчининг ёки реализация қилувчи субъектнинг (юридик ва жисмоний шахснинг) банкдаги ҳисобварағига банк ёхуд бошқа кредит ташкилоти томонидан пул маблағлари ўтказиш йўли билан амалга оширилади.

Истеъмол кредити нақд пулда берилмайди. Қонун расмий эълон қилинган кундан, яъни кучга кирган.

Бу жуда узоқ муҳокамадан ўтган ва Сенат тасдиқлаши кўп вақт олган қонун эди.

@media24uz Ochish/sharhlash

2023-04-11 06:48:00 Қуёш панеллари ўрнатишга 2,5 млрд.

Тошкент вилояти ҳокимлигининг маъмурий-маиший бино иншоотларини муқобил энергия манбалари билан таъминлаш учун 2,5 миллиард сўм маблағ ажратилади.

Пуллар маҳаллий бюджетнинг 2023 йил бошида аниқланган эркин қолдиқ маблағлари ҳисобидан вилоят ҳокимлиги “Ягона буюртмачи хизмати” инжиниринг компаниясига ўтказилади.

@media24uz Ochish/sharhlash

2023-04-10 18:09:57 Референдум тарғиботи боғчаларда олиб борилмайдиган бўлди

Бир боғчада “Конституция меники, сеники, бизники! Конституция ўзимизники” шиори остида болаларга жўр бўлиб айттирилган видео катта шов-шув бўлганди.

Мактабгача таълим агентлиги маълумотига кўра, видеода боғча ходими референдум доирасида ўтказилаётган ташвиқот тадбирларидан руҳланиб, тарбияланувчиларга тушунча беришга уринган.

Айтилишича, ҳолат юзасидан республикадаги барча боғчаларга огоҳлантиришлар берилиб, бу каби ҳолатларнинг олдини олиш тавсия қилинган.

Эслатиб ўтамиз, 30 апрель куни Конституцияга ўзгартириш киритишга бағишланган умумхалқ референдуми бўлиб ўтади.

@media24uz Ochish/sharhlash

2023-04-10 16:21:27 Ғолиб бўлмаган лойиҳаларгаям пул ажратишадиган бўлди

“Ташаббусли бюджет”да таълим, соғлиқни сақлаш, спорт муассасаларини таъмирлаш, моддий техника базасини ривожлантириш, бошқа йўналишлар бўйича ҳар бири 1,5 мингдан ортиқ овоз тўплаган, лекин ғолиб бўлмаган лойиҳаларга ҳам пул ажратилади.

Натижада 164 та мактаб, 30 та боғча ва 32 та касалхонада таъмирлаш, жиҳозлаш ва бошқа ишлар учун 304,6 млрд. сўм қўшимча маблағ берилади.

Бу йилги “Ташаббусли бюджет”нинг яна бир фойдали томони шу бўлса керак: ҳокимлар қайси мактаб ё боғчага пул ажратмаган бўлса, уларни халқ ўзи танлаб берди. Энди давлат алоҳида пул беради.

Шунингдек, 2023 йил 1-мавсумида иштирок этиб, ҳар бири 2 мингдан ортиқ овоз тўплаган, лекин ғолиб деб топилмаган 1309 та лойиҳани амалга ошириш учун қўшимча 1,3 трлн. сўм маблағ ажратилади.

@media24uz Ochish/sharhlash

2023-04-10 08:59:12 Тошкент ҳокими сув тошқинида аҳолини айблади

Тошкент шаҳри ҳокими Шавкат Умрзоқов пойтахт сув остида қолишида аҳолини айбдор деган. Аввалроқ кўп ёмғир ёққани билан ўзини оқлаганди.

"Дренаж тизимини ўргандим. Ўзимиздан ҳам айб қидирайлик, 20-30 фоиз дренажларни фуқароларнинг ўзи уй қуриш жараёнида ёпиб юборган. Биз бу нарсаларни ўрганиб, аниқлаб бўлдик. Ҳозир мазкур тизимни энди қандай тиклаймиз, қонунбузилишига йўл қўйган инсонларга қандай чора кўрилади? Бу – давлат мулки", деган у.

Унинг айтишича, одамлар қурилиш маданиятига риоя қилган ҳолда уй қурмаган, ер остидан ўтган нарсаларни ёпиб ташлаган.

Тошкент ҳокимининг кўзига одамлар қурган уй кўринган. Аммо шаҳарнинг ҳар бир қарич ерида бебошларча қурилган иморатлар эътибордан четда қолган. Президент бош режа тасдиқланмагунча қурилишга бекорга мораторий эълон қилмаган.

Собиқ ҳоким даврида ҳатто миллий хиёбонлар ҳам бузиб қайтадан қурилган, сон-саноқсиз ва қўшимча шароитларсиз (канализация, дренаж, электр энергиясиз) кўп қаватли уйлар сонининг чеки йўқ.

Лекин янги ҳокимнинг кўзига айрим аҳоли қурган уйлар кўринган.

@media24uz Ochish/sharhlash

2023-04-09 09:07:39 Бизда ягона қутқарув хизмати нега йўқ?!

Қутқарув хизмати бор, дейишга шошилманг. Бор, аммо тор хизматда, чекланган. Умуман бугун ягона қутқарув ёки ёрдам хизматига эҳтиёж катта.

Уйингиз ёнса, 101га, жиноят бўлса, 102га, юрагингиз ушлаб қолса, 103га, газ портласа, 104га қўнғироқ қиласиз. Иссиқ сув тошса, 1055га, совуқ сувда 1255га сим қоқасиз.

Айтганча, эшик қулфланиб қолса, чуқурга тушиб кетсангиз, тоғда адашсангиз, алоҳида 1050 қутқарув хизмати бор. Уларга мурожаат қиласиз.

Масалан, Америкада қандайлигини кўпчилик жуда яхши билади. Ҳеч бўлмаганда киноларда кўрган. Юқоридаги хизматларнинг барчаси учун битта, ягона рақам бор — 911. Туну кун ишлайди ва узилиш бўлмайди, қидириб юрмайсиз, уйғонишини ё телефонини кўтаришини кутмайсиз.

Бир мисол келтирамиз: дейлик, ҳозирги кунда, рўза пайтида якшанба куни саҳарда уйингиз шифтидан катта миқдорда сув оқиб туша бошлади. Сиз чол-кампирсиз, ўзингиз эплолмайсиз. Аслида ёшлар ҳам уддалолмайди.

Биринчи ўринда уларнинг хаёлига сантехник келади. Дарров қўнғироқ қилади, аммо у жавоб бермайди, аксинчи телефонини ўчириб қўяди. Ахир дам олиш куни, оғизни ёпгану ухлаган.

Соат эрталаб 5, сув тўхтамаяпти. Уйбошини чақириб, "ЖЕК"дагиларнинг қўл телефонини оласиз. Уларда ҳам жимлик. Охири чол-кампирнинг хаёлига қутқарув хизмати келади: 1050.

Хайрият, 1050дан кимдир гўшакни кўтаради. Сиз вазиятни тушунтирасиз, аммо умуман кутилмаган жавобни эшитасиз: "Биз коммунал соҳада хизмат қилмаймиз". Яна фақат фавқулодда ҳолатда ёрдам беришларини ҳам қўшимча қилишади.

Бу фавқулодда ҳолат бўлмай нима?!

Фавқулодда ҳолатга оид 3 та қонун бор:

"Қутқарув хизмати ва қутқарувчи мақоми тўғрисида", 27.12.2008
"Фавқулодда ҳолат тўғрисида", 16.12.2021
"Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида", 19.11.2022

"Қутқарув хизмати ва қутқарувчи мақоми тўғрисида"ги қонунда фавқулодда вазиятга қуйидагича таъриф берилган: "одамлар қурбон бўлишига, уларнинг соғлиғи ёки атроф табиий муҳитга зарар етишига, жиддий моддий талафотлар келтириб чиқаришга ҳамда одамларнинг ҳаёт фаолияти шароити издан чиқишига олиб келиши мумкин бўлган ёки олиб келган авария, ҳалокат, хавфли табиий ҳодиса, табиий ёки бошқа офат натижасида муайян ҳудудда юзага келган ҳолат".

Бошқа қонунлардаги таърифлар глобал ҳолатларга нисбатан берилган.

Энди катта савол: якшанба куни эрталаб соат 4 да уйда сув тошяпти, уни ертўладан ўчириш керак, ертўла калити "ЖЕК"да, "ЖЕК" уйқуда, шу вақтда уйда ёлғиз чол-кампир нима қилиши керак? Ахир улар давлатга ишониб шунча йил меҳнат қилиб, пенсияга чиққан. Аммо давлат бир оддий ҳолатда ёрдам беролмаяпти.

Бунақа қутқарув хизмати бизга керакми ўзи? Ҳамма соҳани интеграция қилиб, ягона хизмат ташкил қилиш вақти келгандир балки. Одамлар қачонгача кимга, қайси ҳолатда қайси рақамга қўнғироқ қилишни қидириб юради?

@media24uz Ochish/sharhlash

2023-04-08 17:46:51 Ўзбекистон халқ артисти Мурод Ражабов узоқ давом этган қанд касаллигидан 74 ёшда вафот этган.

@media24uz Ochish/sharhlash

2023-04-08 16:13:33 Активист асосчиси 15 суткага қамалди

Активист лойиҳаси асосчиси Ҳожиакбар Носиров миллий, ирқий, этник ёки диний адоватни тарғиб қилувчи материалларни тайёрлаш, сақлаш ёки тарқатишда айбланиб, 15 суткага қамалган.

У бир қатор компанияларга тегишли йогурт маҳсулотларида динда ҳаром саналган моддалар борлигини айтиб, сотиб олмаслик ва истеъмол қилмаслик тасвиясини берган.

Ушбу видеоларда у ҳаром деб эълон қилган ва буни кўпчилик фатво ўрнида тушунган. Кейинчалик блогер бу хатосини тан олган.

Шайхонтоҳур тумани ИИБ ЖҚБ ходимлари уни диний экстремизмда айблаб иш очган ва суд 15 сутка маъмурий қамоққа ҳукм қилган.

Активист интернетда муддати ўтган товарлар, маҳсулотларни аниқлаб, уларни утилизация қилиб, сотувчилар ва харидорларни бундан огоҳлантирадиган жамоатчилик фаоли ҳисобланади.

@media24uz Ochish/sharhlash

2023-04-08 12:24:56 Вазирлик "Маданият ва маърифат" телеканали ўзлаштирилаётганини тасдиқлади

МТРКга қарашли "Маданият ва маърифат" телеканали барча ходимлари билан Маданият ва туризм вазирлигига ўтказилиб, номи "Карвон" деб аталиши кўп муҳокамаларга сабаб бўлган.

Таклиф этилган лойиҳага кўра, юқоридаги телеканал вазирлик тасарруфига олинади. Унинг мазмуни сақланиб қолиши айтилган, шу билан бирга кўнгилочар дастурлар ҳам қўшилади.

Ижтимоий тармоқ фойдаланувчилари, айниқса, зиёли қатлам вакиллари бунга астойдил қарши чиққан. Айрим фикрларга кўра, туризмни ривожлантириш мақсад бўлса, "Дунё бўйлаб" каналини ўзлаштириш мумкин.

Ҳатто тармоқда "Маданият ва маърифат" телеканали ёпилишига қаршиман!" номли челленж ҳам бошланган.

Бугун вазир Озодбек Назарбеков ушбу муҳокамаларга муносабат билдираркан, телеканал ўзлаштирилаётганини инкор этмаган. Аксинча, уни ривожлантиришда зиёлиларни ҳамкорликка чақирган.

@media24uz Ochish/sharhlash