БОЛАЖОНИМГА. Икки йўл орасида турган жон қизим. Юкли бўлиш | Мастура Хожи Она Шеьрлари

БОЛАЖОНИМГА.


Икки йўл орасида турган жон қизим.
Юкли бўлиш ярашган ойим, юлдузим.
Сени ҳар кўрганда қувнайди кўзим.
Болангни бағрингга босиб ол, қизим!

Йўқдан бор қилувчи Аллоҳим- Ҳолиқ.
Ўзи супрасидан қўймабди қуруқ.
Беҳисоб шукрлар, ҳамдлар ва қуллуқ.
Болангни бағрингга босиб ол, қизим!

Юзингдаги доғ ҳам қўшибди ҳусн.
Бўлажак оналик муборак бўлсин.
Қучоғинг соғлом фарзандга тўлсин.
Болангни бағрингга босиб ол, қизим!

Кўнглинг нима тусар, муҳайё қилай.
Кузда довуччами, қишда қулупнай.
"Анқонинг уруғи" десанг ҳам топай.
Болангни бағрингга босиб ол, қизим!

Сўзларимни тингла, сендан илтимос.
Сен касал эмассан, юклисан халос.
Кўп ётма, талтайма, эҳтиёт бўлсанг бас.
Болангни бағрингга босиб ол, қизим!

Рангингдан ранг бериб, жисмингдан жонинг.
Тўлғоқ минг бўлакка бўлади жонинг.
Шунинг учун шириндир болажонинг.
Болангни бағрингга босиб ол, қизим!

"Этагингдан тушгандек" бўлади, болам.
Чидайсан, тортсангда аччиқ дард, алам.
"Онажон"- деб мени эсларсан шу дам.
Болангни бағрингга босиб ол, қизим!

"Суюнчи!"- деган сўз эшитай, қизим.
Олдиндан билдирма, онага қийин.
Барибир сезади оналар кўнгли.
Болангни бағрингга босиб ол, қизим!

Суюнчим ҳам тайёр қудам, куёвга.
"Муборак бўлсин"га бориб бирровга.
Бешикка ҳаракат бошлай дарровда.
Болангни бағрингга босиб ол, қизим!

Фарзанд - Аллоҳимнинг буюк неъмати.
Ўғилдир, қиздир уйинг зийнати.
Эрингнинг давлати, юзи, савлати.
Болангни бағрингга босиб ол, қизим!

Оналик муборак, ойдиним қизим!
Ҳолиқ Аллоҳимга шукрлар бўлсин!

https://t.me/Masturahojionasherlari