#Arxiv
Hayotingdan ketsam...
Dabdurustdan ketib qolsam hayotingdan,
Shirin soʻzlar sogʻintirib qoʻymaydimi?
Yoz chillasi boʻlsa hamki huddi kuzdek,
Osmonlaring qosh-qarogʻin uymaydimi?
Hira tortib ketmaydimi oq tonglaring,
Tunlaringni yulduzlari jilo qilmay.
Huddi rostdek qabul boʻlmay yolgʻonlaring,
Qoʻymasmilar seni jondan shirin bilmay!
Seni hatto oʻzidan ham qizgʻonar kim,
Kim gadodek tilanadi har soʻzinga.
Ketib qolsam bu dunyoda aniq hech kim,
Ming oshiqni alishmaydi bir oʻzinga!
Dabdurustdan ketib qolsam hayotingdan,
Pushaymonlar seni chaynab yutmaydimi.
Duolarim panoh boʻlgan bu dunyoning,
Azoblari jon-joningdan oʻtmaydimi?
Mehr qahat zamonadan mehr istab,
Koʻzlaringda buloq koʻzin ochmaydimi.
Qay chamanga boray desang meni izlab,
Atirgullar tikanlarin sanchmaydimi?
Ismim aytib uygʻonasan tushlaringdan,
Qaydasan deb nolishlaring sochmaysanmi.
Ming ahtarib, izimni ham topa olmay,
Soʻng chorasiz ishqqa aza ochmaysanmi!
Dabdurustdan ketib qolsam hayotingdan...
