​​Маънавият ўзини таниш, ўзини ўзгалар назари билан, ўзгаларни | MA`RIFAT DARSI | INSPECTOR_UZ

​​Маънавият ўзини таниш, ўзини ўзгалар назари билан, ўзгаларни эса ўз назари билан тафтиш қила билиш демакдир. Ҳар бир алоҳида шахс ва бутун жамиятнинг кучи фуқаролар маънавиятини соғлом асосларда шакллантиришга йўналтирилиши керак. Шахснинг маънавий комиллиги жамиятнинг одиллигига, жамиятнинг одиллиги маънавиятнинг юксаклигига, маънавиятнинг юксаклиги эса шахс камолотига таъсир ўтказаверади. Шахс, жамият ва маънавиятнинг ўзаро уйғунлиги, шу тариқа, инсоният тараққиётининг асосий омили бўлиб қолаверади. Бу жабҳада буюк Навоийнинг битганлари тенгсиз бир қуролдирки, ундан тўғри фойдаланиш улкан маънавий ғалабаларга гаров бўлади. Бунинг учун элнинг асл фарзандлари ғафлатни тарк этишлари жоиз. Зеро, Навоий бежиз:
Беишқ улусқа ком уйқу,
Ишқ аҳлигадир ҳаром уйқу,
демаган. Чиндан ҳам кўнгли юксак туйғуларга ёт кимсалар учун уйқу мақсад, ҳаловат, орзу бўлса, қалби ҳақ ва халқ ишқи, ҳақиқат ва адолат севгиси билан тўла инсонлар учун ҳаромдир. Ҳазратнинг маънавий уйғоқлик йўлидаги чорлови кўпчиликни уйғотишига ишонамиз.

Қозоқбой Йўлдошев,
филология фанлари доктори,
профессор.