2023-03-08 05:49:53
Сен бир чечакмидинг богда очилган,
Ёки бир либосми, баҳтга бичилган,
Дунёга эзгулик сен-ла сочилган,
Мен сени азизам дейинми аёл?
Сен учун ёзилди қанча қўшиқлар,
Ортингдан оввора қанча ошиқлар,
Қошингда эриди тошдан қаттиқлар,
Мен сени азизам дейинми аёл?
Сени ҳақ йўлингдан тойдиргучи кўп,
Сўнг эса миш-мишлар ёйдиргучи кўп,
Баъзида жонингдан тўйдиргучи кўп,
Мен сени азизам дейинми аёл?
Жойинг пойгак бўлди, доим, тўр эмас,
Меҳнатинг, заҳматинг ошкор, сир эмас,
Жонингни дедилар қирқта, бир эмас,
Мен сени азизам дейинми аёл?
Сен менинг синглимсан, опам ё онам,
Ёки бир келинчак, ёки бир санам,
Сенга қурбон бўлсин бу жон, бу танам!
Мен сени азизам дейинми аёл?
31 views02:49