Matnazar ABDULHAKIM | Матназар АБДУЛҲАКИМ

2022-07-28 19:45:35

Ochish/sharhlash

2022-07-24 16:06:34 * * *
Жимжит оқиб ётар ариқларда сув
Саодат бахш этиб ўтга, ўланга.
Нақадар ғаройиб ёз фасли бу боғ
Сирлар ўлкасидир ҳар бир кўланка.

Толе тамасида толлар тўлғанар,
Қушлар қий-чувлашар бахт илинжида.
Барқ уриб ям-яшил ором олади
Гужумлар бир-бирин пинжида.

Овлоқ-овлоқларда ошиқлар сархуш,
Бўсалар жимгина ҳайқирар.
Фаррош кампир ёлғиз... кузда хазонларни
Қандай супуришни қайғурар.

Матназар АБДУЛҲАКИМ

@M_Abdulhakim
https://t.me/+tL3NXBchr6lhYTQ6 Ochish/sharhlash

2022-07-23 20:30:14 ЙЎЛОВЧИ ҚИЗ

Ўтасан сумкангни кифтингга илиб,
Кенг кўча. Одамлар. Салом ва алик.
Тўхтаб қолмас ҳеч ким ҳайрон тикилиб,
Лоқайд бўладими эл ҳам шунчалик.

Духобага дўнмас сен юрган йўллар,
Дарахтлар қолади изингдан кетмай.
Гулдек қизарсанг ҳам совқотиб, гуллар
Кўмилиб ётади уялмай-нетмай.

Сўнг бекат. Чиқасан автобусга жим.
Пассажирлар лоқайд. Зотан, сан
Улар учун ҳамроҳ ёки йўловчи,
Хуллас, одатдаги одамсан.

Шунда бирдан чиқиб кетади жаҳлим,
Ногаҳон келаман ларзага.
Сен деб айланаман шу заҳот, бахтлим,
Ҳамма одамга ва ҳамма нарсага.

Халойиқ бўламан — ошуфта, сармаст,
Гул бўлиб, шафақранг ўйга толаман.
Дарахтман. Ёнимдан ўтиб қолсанг, бас,
Эргашиб, изингдан мен йўл оламан.

Тутқич бермай кетиб қоласан бироқ
Хиромон-хиромон, сокин, оҳиста...
Мендан бахтиёрроқ ва муносиброқ,
Ўзингдек мукаммал бир ҳамроҳ истаб.

Майли. Ҳар қадаминг мен учун фахр,
Сира элаштириб билмайман сани.
Тушунаман, севиш оғир...кўп оғир
Ҳамма одамни ва ҳамма нарсани.

Матназар АБДУЛҲАКИМ

@M_Abdulhakim Ochish/sharhlash

2022-07-23 08:46:41 * * *

Парвойим йўқ ҳозир хом, пухталарга,
Унутдим дунёнинг нася, нақдларин…
Юракнинг олис бир нуқталарига
Қайтиб келаётир шоир вақтларим.

Аранг милтиллайди олисда овул,
Тим-тирс… илғанади безовта руҳлар.
Ойнакўл тушига киради довул,
Ҳар баргда бир шамол донг қотиб ухлар.

Ҳар лаҳза қаърига бекинган минг йил,
Сукунат ҳайқирар қутлуғ отингни.
Бутун борлиқ қаттиқ бириктирган тил
Сўндирмаслик учун ёдингни.

Мунаввар бир дастёр ёғдулар мулки,
Тиним билмайди ҳеч осмонда қуёш.
Нур таратар ёдинг — лабларда кулгу,
Ёғду сочар ёдинг — кўзлардаги ёш…

Матназар АБДУЛҲАКИМ

@M_Abdulhakim
https://t.me/joinchat/AAAAAFMinnToJEu--B39wQ Ochish/sharhlash

2022-07-19 09:56:16 Матназар Абдулҳакимнинг ўқитувчи ҳақидаги ўша машҳур "Дарсдан сўнг" шеъри!

"...Нўноқ назмим учун афв эт, халқим,
На олим, на фозил, на сўз пириман.
Ўз вақтида дафтар топшира олмай
Қолган болаларнинг бириман..."

"Қақнус"

@mm_telekanal Ochish/sharhlash

2022-07-09 09:20:30 * * *

Тантаналар шунчаки боис,
Жўн баҳона кентлар, шаҳарлар.
Оқшомлар ҳам шунчаки сабаб,
Шунчаки бир рўкач саҳарлар.
Асрлар ҳам ашаддий бидъат,
Хурофотдир ҳар бир дақиқа.
Ҳақиқатдир сенинг жамолинг,
Жамолингдан ҳайрат ҳақиқат.
Кун сени деб чиқади уфқдан,
Тонг сени деб ҳар тонг отади,
Раҳми келиб сўнг юлдузларга,
Шўрликлар кўрсин деб ботади.
Мабодо бир келмасмикан деб
Бунёд бўлган Хива, Сайрамлар.
Сени кўриб қувониш учун
Келар ҳайит, келар байрамлар.
Дийдорингдан телбалар бўлиб
Оламнинг чарх уриб бормоғи,
Ушлай деса, ёқаси йўқдир,
Тишлай деса, йўкдир бармоғи.

Матназар АБДУЛҲАКИМ

t.me/joinchat/AAAAAFMinnToJEu--B39wQ Ochish/sharhlash

2022-07-08 06:27:47 AБДУЛЛA AҲМAД ҒAЗAЛИГA
МУХAММAС

Ўзни қутлай Сиз билан, танларни, чун, жонлар билан,
Қушни, синган кун қафас, қутлайман осмонлар билан,
Елкамизга тегди офтоб, эрди гавронлар билан,
Дўстларим, табрик қилай бу яхши давронлар билан,
Мақсади бир, ҳамнафас дўсту қадрдонлар билан.

Дил ўзи машҳур юракда, не учун айтмоқ “адан!”,
Она Юрт кошона, тўр ҳар парчаси “йўқдир адан”,
Бахт келар меҳнат билан, келмас у асло дафъатан,
Довруғи достон бўлиб гулларга бурканди ватан,
Кенг қулоч ёздик фазога шавкату шонлар билан.

Мурчга мурчдир, не саодат, қандга қанддир халқимиз,
Гоҳи ердан паст, гoҳи кўкдан баланддир халқимиз,
Меҳнату ижод билан ҳар лаҳза банддир халқимиз,
Мустақиллик нуридан кўп баҳраманддир халқимиз,
Чарчамай меҳнат қилур чин ақду паймонлар билан.

Сувларидир тип-тиниқ, субҳинасийми сарсари,
Тахтидир тоғлар анинг ҳам офтобдир афсари,
Шундайин султон элим, жавлонда тун-кун ёш қари,
Мангу машъал бу диёр ташлар қадам тинчлик сари,
Ўлкага қувват бериб мўл пахта хирмонлар билан.

Кулфат отлиғ ёвга қарши мард, баҳодир ҳар минут,
Бизга Оллоҳдин нажийб хайру саходир ҳар минут,
Шу сабаб ноёбдир ҳар лаҳза ва нодир ҳар минут,
Шодлигим сиғмас юракка, бебаҳодир ҳар минут,
Она юртим фахр этар бу бахтиёр онлар билан.

Шеър ёзиб, йўқ миннатим, айтиб қўшиқ, йўқ дағдағам,
Довдиратмас на машаққат, на севинч ёхуд на ғам,
Дўст билан Aбдулҳаким кўрдим зафарларни баҳам,
Эй улуғ айём, сенга хизмат қилар Aбдулла ҳам,
Ёзиб ўз ёш қалбидан, кўп шеъру достонлар билан.

Матназар АБДУЛҲАКИМ

https://t.me/joinchat/AAAAAFMinnToJEu--B39wQ Ochish/sharhlash

2022-07-06 15:45:46 Ўроз ҲАЙДАР: "Хоразм серсув маъво экан. Бир-бирига ёндаш каналлардан Аму суви тўлқинланиб оқаётганидан ҳузурланасан: чор-теварак яшил. Қум барханлари орасида балиқчилик учун кўллар сероб. Хоразмга бориб балиқ тановул қилмабсиз, ҳузур топмабсиз деган гап бор. Хоразм элининг ардоқли шоири Матназар Абдулҳакимнинг қабрини зиёрат қилиш ва қуръондан тиловат қилиш ниятим эди..."

Давомини ўқиш: https://telegra.ph/%D2%B2AYOT-BIR-J%D0%8EL--S%D0%8ENGSIZ-BETIMSOL-07-06

https://t.me/M_Abdulhakim Ochish/sharhlash

2022-07-06 06:44:43 ##Ажойиб_янгилик
#яна_Қақнус_давраси

Кўрсатувнинг янги сонида Матназар Абдулҳакимнинг "Дарсдан сўнг" шеъри ўқилди.

"Қақнус"нинг янги сонини ўтказиб юборманг!

"Madaniyat va maʼrifat" телеканалида
"Қақнус"
6 июл, соат 21:00.

https://t.me/joinchat/AAAAAFMinnToJEu--B39wQ Ochish/sharhlash

2022-07-02 20:55:31 Матназар Абдулҳаким

АЖИНИЁЗ ОҲАНГЛАРИДА
Иброҳим Юсуповга

Гарчи гала – гала қузғун, зоғлар кўп,
Бир булбули билан бахтли боғлар кўп.
Кулгичлари юракларда чоҳ қазган,
Қоши ҳилол, чеҳралари моҳлар кўп.

Умид сўнмас юлдуз чархи ишқ аро,
Ишқ бирла манглай оқ, йўқдир у – қаро,
Муҳаббат мулкида йўқдир фуқаро,
Лекин унда... лекин унда... шоҳлар кўп.

Кафтимдадир юрак, уни ёпмадим,
Итлар қопди, мен итларни қопмадим.
Юрак!.. сендан сулув дилдор топмадим,
Лола каби қонсан, сенда доғлар кўп.

Шоирлар бор, минг йил олдда кўзлари,
Минг йил ўтмиш ҳақда айтган сўзлари.
Шоирлар бор, уриб туриб ўзлари,
Бошга кийиб осмонни, воҳ-воҳлар кўп.

Ҳар мазмун ҳам шеърларга юк бўлолмас,
Ҳар оқин ҳам мумтоз, буюк бўлолмас.
Ҳар жонивор марол, кийик бўлолмас,
Бошларида гарчи узун шохлар кўп.

Руҳ оламин қаъринда гулдуракдир,
Бу шеърият Наврўзиндан даракдир.
Шоир чексиз йўлда, манзил юракдир,
Гарчи унда томирлардан роҳлар кўп.

Биз бир шоир кўп қайсар, кўп ўжармиз,
Ўч денг ёниб, ён денг, дарров ўчармиз.
Патқаламдан қанот боғлаб учармиз,
Ночор қолгай пойимизда чоҳлар кўп.

Шеъриятда бут ушатган Халилсиз,
Зўр билан зўр залил билан залилсиз.
Ҳам ҳазрати Яъқублардан далилсиз,
Йўл кўрсатинг, ҳали ҳам гумроҳлар кўп.

Дунё шундай, шамоллар ғув-ғувлайди,
Дунё шундай қашқирлар ув-увлайди.
Дунё шундай, қумрилар қу-қувлайди,
Дунё шундай, қарғалар қоғ-қоғлар кўп.

Тафаккур бир майдон... кетар жим пойга,
Ким шоирга мухлис, мухлис ким бойга.
Шеър деб Мажнун бўлиб келдик Чимбойга,
Урганч ёқда қолиб кетди соғлар кўп.

Ҳар бир юрак минг навога шайланар,
Қўшиқ куйга, куй қўшиққа бойланар.
Жўн бир, жўн бир сўзлар шеърга айланар,
Сур қамардир Тўрткўлда янтоғлар кўп.

Байтларингиз гоҳ гулдирлар, гоҳ ҳанжар,
Гоҳ палахмон, душман бошларин янчар...
Ёв мард бўлса, кўксингга шарт тиғ санчар,
Номардлар оқ юзингни чантоғлар кўп.

Қутлуғ бўлсин шеъриятнинг камоли,
Эзгуликдир, муҳаббатдир аъмоли.
Эсиб турсин мангу Жайҳун шамоли,
Иброҳим Юсуф бир! Қорақалпоқлар кўп.

Еллар кетсин хазонларни супуриб,
Чаманларда толе эссин уфуриб.
Юрагимда дулдулларнинг дупури,
Жаранглаган баланд – баланд тоғлар кўп.

https://t.me/joinchat/AAAAAFMinnToJEu--B39wQ Ochish/sharhlash