2023-03-13 12:43:09
O'zgacha vayb, nostalgiya, dunyolarga teng rejalaringga almashgan jannating...
Sen qishloqni o'ylaganingda, ba'zida shunchalik soddaligidan jig'ingga tegadigan insonlar, molxona hidi va sen qochgan ishlar xayolingda gavdalanadi. Shaharda bular deyarli yo'q, hamma narsadan qoniqib yashab yuribsan.
Ammo xotiralaring eshiklarini ochganingda, u yerda faqat maktabdagi do'stlaring bilan kompyuter o'ynaganlaring, bayramlarda umuman tanimaydiganlaring bilan yaqin insondek xursandchilik qilganlaring bo'lmaydi-ku. Ozgina yursang, musiqa ohanglari, do'stlaringning sen uchun beozor hazillari tugagan joyda sal qolsa unutayozganing — qishloq xotiralari boshlanadi. Yoz, tush vaqtida hamma uyquda, hamma charchagan. Faqat senda uyquga sabr yo'q. Daraxt soyasi salqinlatib turgan so'ridan tushib, anhor tomonga borasan. Suvi unchalik ham tiniq emas. Senga taqiqlashgan u yerga borishni. Sen esa har gal cho'milaverasan anhorda. Anhorda suv kamayib, cho'milishni gashti pasaygan vaqti poliz oralaysan. O'rtacha, yaxshi pishgan tarvuz yo qovunni olib, tollar tarafga ketasan. Kechqurun hamma jamlanib, ovqat yeyishadi. Ko'chada, so'rini ustida. Hech qanday televizor, suv solig'ini to'lash kerakligi haqidagi suhbatlarsiz.
Ertasiga uyg'onganingda hamma uyqudan turgan bo'ladi. Yuzingni ariqda yuvib olasan, oshxona tarafga borganingda, yonib turgan tandirning xushbo'y hidi keladi. Demak bugun sendan baxtli inson yo'q.
Yaqin orada kamida 4-5 km narida do'kon bor. Senda pul bo'lgan vaqti ishga chaqirishmasa, o'sha yoqqa otlanasan. Yo'lda albatta uyida 2-3ta qo'rqinchli itlari bor uy bo'ladi. Ba'zida sekin o'tib ketasan, ba'zida iloji boricha tezroq yugurishingga to'g'ri keladi. Do'konchi qiz tengdoshing, undan go'zal qizni ko'rmagansan (hozircha). Unga mahliyo holda ancha-muncha narsa olvolasan. Uyga kelib, olgan narsalaringni yeb boshlaganingda, qiz esingga ham kelmaydi.
Aynan shu xotiralarni qayta jonlantirish uchun ham qishloq seni chorlayveradi
42 views09:43
L
