Лаа илааҳа иллаллоҳу

2022-12-29 05:41:19 وَإِذَا حُيِّيتُم بِتَحِيَّةٍ فَحَيُّوا بِأَحْسَنَ مِنْهَا أَوْ رُدُّوهَا إِنَّ اللَّهَ كَانَ عَلَى كُلِّ شَيْءٍ حَسِيبًا

Қачонки сизга бир саломлашиш ила салом берилса, ундан кўра яхшироқ алик олинг ёки худди ўзидек жавоб беринг. Албатта, Аллоҳ ҳар бир нарсанинг ҳисобини олувчидир.
("Нисо" сураси, 86- оят)

@laa_ilaaha_illallohu Ochish/sharhlash

2022-12-28 20:21:58 "Ассалому алайкум"–"Сизга салом бўлсин" деб салом бермоқ Аллоҳ таолонинг Салом исмини эслатиш, соғлик-омонлик, тинчлик- хотиржамлик тилаш деганидир.

Абу Ҳурайра розияллоҳу анҳудан ривоят қилинади:
Расулуллоҳ соллаллоҳу алайҳи васаллам: "Мўмин бўлмас экансизлар, жаннатга кирмайсизлар. Бир-бирингизни яхши кўрмас экансиз, мўмин бўлмайсизлар. Сизларга, агар уни қилсангиз, бир-бирингизга муҳаббат пайдо қиладиган бир ишни ўргатиб қўяйми?! Орангизда саломни кенг ёйинг”, дедилар.
(Муслим ривояти)

Салом бериш–суннат амал,
саломга алик олиш эса–вожибдир.

@laa_ilaaha_illallohu Ochish/sharhlash

2022-12-28 18:25:55 Хўп, "Салом" исми нимани англатади-ю, "салима" феъли қандай маъноларни билдиради?

Аллоҳ таолонинг Салом исми кўп маъноларни ифодалайди.

Шулардан бири соғ-саломатликдир. Шу маъносидан "салима" феъли олинган бўлиб, бу сўз "соғлик-омонлик", "бехатар бўлиш", "қутулиб қолиш", "жон сақлаш", "халос бўлмоқ", "нажот топмоқ", "озод бўлмоқ", "эркин бўлмоқ"  каби кўплаб маъноларни билдиради.

Ва яна "салом бермоқ", "саломатлик тиламоқ" каби маънолар ҳам шу сўздан олинган.

Демакки, салом бермоқ ва саломатлик тиламоқ ҳам, аслида, Аллоҳ таолонинг Салом исмига боғлиқ экан.

@laa_ilaaha_illallohu Ochish/sharhlash

2022-12-28 17:53:06 وَعَلَّمَ آدَمَ الْأَسْمَاءَ كُلَّهَا ثُمَّ عَرَضَهُمْ عَلَى الْمَلَائِكَةِ فَقَالَ أَنبِئُونِي بِأَسْمَاءِ هَؤُلَاءِ إِن كُنتُمْ صَادِقِينَ

Ва Одамга исмларнинг барчасини ўргатди, сўнгра уларни фаришталарга кўрсатиб: «Агар ростгўйлардан бўлсангиз, манавиларнинг исмларини менга айтиб беринг­чи», – деди.
("Бақара" сураси, 31- оят)

@laa_ilaaha_illallohu Ochish/sharhlash

2022-12-28 17:52:15 6. Ас-САЛОМ   السَّلَامُ

Аллоҳ таолонинг Ас-САЛОМ исмидан "салима" феъли олинган.

Адашмадингиз, мен ҳам янглишмадим. Айнан Аллоҳ таолонинг исмидан араб тилидаги "салима" сўзи олинган.

Аслида, мен мана бундай ёзишим керак эди: "Салом" исми "салима" феълидан олинган бўлиб..."
Ва ҳоказо.
Чунки, грамматика қоидалари шуни талаб қилади.

Аммо, ҳамма тилларни ва тил қоидаларини ҳам Аллоҳ таоло яратганини эътиборга олсак ва У Зотнинг барча исм-у сифатлари азалдан Ўзига хос эканини назарда тутсак, юқоридаги гапга эътироз қолмайди.

Билмадим, балки тил қоидалари ҳақида, ҳеч бўлмаганда феъл исм(от)дан олдинми ёки от(исм) феълдан аввалми экани ҳақида жиддийроқ ўйлаб кўриш керакдир.

Ҳар ҳолда, мен шундай ўйлаб қолдим. Чунки, "Аллоҳ таолонинг исми фалон сўз(феъл)дан олинган деган гапни ёзишга, ҳаттоки шундай ўйлашга ҳам дилим ғашланиб қолди...

Қолаверса, отамиз Одам алайҳиссаломнинг биринчи айтган сўзлари ҳам, Аллоҳ таоло ўргатган дастлабки сўзлар ҳам нарсаларнинг исми эди.

@laa_ilaaha_illallohu Ochish/sharhlash

2022-12-28 13:44:45 Ё Ҳаққ, Сенинг йўлинг энг тўғри йўлдир,
Иймон-у ихлос-ла қалбимни тўлдир.
Сўнгги нафасгача иймонда бўлдир,
Шу йўлда яшатгин, шу йўлда ўлдир...

Шаҳобиддин Одил

@laa_ilaaha_illallohu Ochish/sharhlash

2022-12-27 16:54:35 #РУҲИЯТ

    5.АЛ-ҚУДДУС, АС-СУББУҲ

             Муножот 

Олам ожиз эрур қилмоққа идрок,
АЛ-ҚУДДУС, ас-СУББУҲ эрур комил пок.

Муқаддас демоққа фақат Сен ҳақли,
Англар буни бўлса ҳар кимнинг ақли.

Нолойиқ сифатдан покдир Камолинг,
Айб-у нуқсондан пок Сенинг Жамолинг.

Бирор бир камчилик йўқдир Зотингда,
На феълинг, на ишинг ва на Отингда.

Мутлақо покдирсан ҳар бир жиҳатдан,
Хато-ю нуқсондан, уйқу, ғафлатдан,

"Адашар, янглишар, ожиздир", ҳатто,
"Бепарво" демоқ ҳам хатодан хато.

Қиёс қилсинлар деб яхши-ёмонни,
Синовлар ичига отдинг инсонни,

Ҳар бир нимарсанинг зиддин яратдинг,
Яхшига ёмонни қўшиб таратдинг.

Оқ-қора, кас-нокас, сахий ва бахил,
Садоқат-хиёнат, уришқоқ-аҳил,

Соғлиқнинг зиддига касал ҳам бўлди,
Заҳарнинг зиддига асал ҳам бўлди,

Юксаклик-тубанлик, жоҳил ва оқил,
Гўзаллик-хунуклик, золим ва одил…

Буларнинг барчасин яратдинг Ўзинг,
Эл фарқин билсин деб қаратдинг Ўзинг.

Аммо булардан ҳам аввал бор эдинг,
Покликда танҳо-ю бетакрор эдинг.

Тасаввурга сиғмас беғубор эдинг.
Барча пок номларга сазовор эдинг

Йўқ эди ҳеч нарса, Бир-у Бор эдинг.
ЖАББОР, ҒАФФОР, ҚАҲҲОР ҳамда ЗОРР эдинг.

Биз ночор бандалар уриниб ҳарчанд,
Ақлимиз, онгимиз ўйлаш билан банд,

Зотингни англашга ета олмаймиз,
Ҳаттоки, тасаввур эта олмаймиз.

"Суббуҳун Қуддусун" демоқдан ўзга,
Тил ожиз қолгайдир бошқа бир сўзга.

Ҳар қандай васфлардан кўра Олийсан,
Мутлақ покликка ҳам танҳо Волийсан.

Ё Қуддус, ё Суббуҳ, ё Рабб, ё Аллоҳ,
Нафсимиз, хулқимиз айлагил ислоҳ.

Поклик сифатингдан улуш бер бизга,
Каломингни жойлаб пок қалбимизга.

Расулинг хулқидан олиб биз ибрат,
Жаннатинг йўлида қилайлик ғайрат.

Шаҳобиддин Одил

 @laa_ilaaha_illallohu Ochish/sharhlash

2022-12-27 16:42:57 Умумий асосий хулоса

Ал-Қуддус бўлган Аллоҳ таолога тасбиҳ айтиш–улуғлаб ёд этиш учун фақатгина Қуръони Каримда ва саҳиҳ  ҳадисларда баёни келган калималардан фойдаланиш  энг тўғри йўлдир.

Булар ҳақида эса каналимизнинг биринчи кунларидан бошлаб етарлича маълумот бердик.
Янги қўшилган дўстларимиз шунчаки каналнинг биринчи хабарига ўтиб, бир бошдан кўриб чиқишлари мумкин.

Шунингдек, ал-Қуддус бўлган Зотга, Унинг раҳмати, марҳаматига, жаннатига муносиб бўлиш учун, яна айнан Қуръони Каримга ва саҳиҳ ҳадисларга юзланишимиз керак.

Мўминларнинг Қуръони Каримда ва саҳиҳ ҳадисларда баён қилинган сифатларини ўзлаштиришимиз, Расулуллоҳ соллаллоҳу алайҳи васалламнинг хулқларидан ибрат олиб, ахлоқимизни, яъни нафсимизни поклашимиз лозим.

Кимдир Қуръони Каримда ва саҳиҳ ҳадисларда баёни келгандан бошқача йўллар билан нафсини–ахлоқини поклашга ҳаракат қилса, фақатгина адашиб, залолатга тушиб қолади.
Чунки, мўминлик учун, мўминнинг ахлоқи покланиши учун Қуръон ва ҳадисдан бошқа йўлнинг ўзи йўқ!

@laa_ilaaha_illallohu Ochish/sharhlash

2022-12-27 07:28:38 Ал-Қуддус(беҳад пок) бўлган Аллоҳ таоло бандалари учун покиза жаннатларни яратиб қўйган.

Бу жаннатларга олиб борувчи пок йўлни–пок шариатни жорий этиб қўйган.

Пок шариатга амал қилишни ўргатиш учун гўзал хулқли покиза бир бандасини–Муҳаммад алайҳиссаломни Расул(элчи) қилиб танлаб олди.

Ўзидан бу элчисига ваҳийни етказиб туриш учун Руҳул Қудусни–пок руҳни–Жаброил алайҳиссаломни элчи қилиб тайинлади.

Бу йўлнинг бошидан охиригача фақат поклик асосига қурилган. Ва энг муҳими шундаки, буларнинг барчаси биз учун, бизнинг ўша пок жаннатларда абадий бахтли бўлишимиз учун қилинган.

Демак, биз ҳам Аллоҳ таолонинг пок бандалари бўлишга ҳаракат қилишимиз лозим.

Бунинг учун эса, нафсимизни, қалбимизни, баданимизни–бутун борлиғимизни поклашни ўрганишимиз керак.

Бу йўлда Расулуллоҳ соллаллоҳу алайҳи васалламнинг сийратларига, суннатларига эргашиш ҳар бир мўмин-мусулмон учун вожиб бўлади.

@laa_ilaaha_illallohu Ochish/sharhlash

2022-12-27 05:45:36         Хулосалар

Аллоҳ таолонинг ал-Қуддус исми маъноларини, бироз бўлса-да, ўрганиб олдик.
Ана энди, ўзимиз учун баъзи бир хулосалар чиқариб олсак ҳам бўлади.

Демак, ал-Қуддус–мукаммал даражада пок, ҳеч қандай айб-у нуқсони, камчилиги йўқ Зот дегани экан. Ўхшаши, тенги, қиёси бўлмаган яккаю ягона илоҳ. Демак, бу–Аллоҳ!

Бундан биз бандалар қандай ибрат оламиз, бу исмдан биз бандаларга насиба борми?

Ал-Қуддус исми далолат қилган тавҳидга кўра, бизнинг ишимиз айнан бандаликдир. Яъни, ал-Қуддус бўлган Аллоҳ таолонинг амр-буйруқларини бажариш.

Ибрат шундаки, ҳеч бир айб-у камчилиги, нуқсони бўлмаган, ҳар жиҳатдан пок бўлган Зотнинг буйруқларида ҳам хатолик, камчилик, адолатсизлик бўлмайди. Демак, бундай Зотга сўзсиз итоат этиш ўзимиз учун фойдалидир.

@laa_ilaaha_illallohu Ochish/sharhlash