ОНАМ... Жонимни жонига илганим Онам, Дардимни кўзимдан билган | KASALLIKLAR TV ТАШРИФНОМАСИ
ОНАМ...
Жонимни жонига илганим Онам,
Дардимни кўзимдан билганим Онам,
Баъзан соғинтириб андуҳ юттириб,
Мен нодон бағрини тилганим Онам...
Гоҳо борганимда ҳаётдан нолиб,
Бошимни силаган бағрига олиб,
Дардларга йўғрилган ўз кўнгли қолиб,
Кўнглимга яхшилик қилганим Онам...
Дунё ташвишлари бўлмаса адоғ,
Номардлар йўлимга қўйсалар тузоқ,
Жим келиб юзимга термулиб узоқ,
Болам деб далдалар берганим Онам...
Зарра озор кўрсам сиғмай ўзига,
Зулматдек кўринар дунё кўзига,
Энг яхши гапларни ўраб сўзига,
Қалбимдан ғамларни терганим Онам...
Ҳеч кимга ўхшамас мехри оромим,
Фахрим ҳам ўзидир шарафим шоним,
Унинг борлигидан яйрайди жоним,
Онам деб кўксимни керганим Онам...
Жонимни жонига илганим Онам,
Дардимни кўзимдан билганим Онам,
Баъзан соғинтириб андуҳ юттириб,
Мен нодон бағрини тилганим Онам...
Зоҳид Зиё...
@KASALLIKLARTV Уй шифокорингиз биз бўламиз!
