2023-03-02 08:14:46
Mana 11 kundan beri Bo‘stonliqning bir burchagidagi oromgohdaman. Birinchi mavsumdagi o‘quvchilarimni kuzatib, yana bir guruhini qabul qilib ham oldim. Hozir gap bu haqda emas.
Oromgohga kelishda 5 ta kitob olib kelgandim. Xayolimda “bo‘sh vaqtim ko‘p bo‘ladi, hammasini o‘qib chiqaman” degan balandparvoz o‘ylar bor edi. Ha, bo‘sh vaqtim yetarlicha topilyapti. Ammo kitob o‘qish kitobxondan ruhiy tayyorgarlik va mulohazakorlikni talab qiluvchi jarayon. Shu sababdan ham hali bittasini ham tugatmadim oxirigacha.
Anna Frank kundaligini o‘qiyapman. Mutolaa davomida ikki xil dahshat ichidaman — kitobdagi urush va imlo xatolaridan tug‘iladigan dahshatlar! Kitob “iRead.uz” loyihasi muallifligida “Factor press” nashriyotida chop etilgan. Musahhih haqida ma'lumot yo‘q, kitob holatiga ko‘ra, u bo‘lmagan ham. Xay, bu endi doimiy uchab borayotgan alohida bir fojia.
Kundalikni mutolaa qilarkanman, tasodifan qayerda ekanim yodimdan ko‘tariladi. Tabiatim INFP-T bo‘lgani uchundir, o‘z qayg‘umga qaraganchalik befarqlik qila olmayman o‘zgalar dardiga. Hatto, asar qahramonlariga ham. Bu esa kitob o‘qishdan olinadigan zavqni ikki hissa oshiradi: ular bilan birga xavotirga tushaman, eshik taqillasa, diqqat bo‘laman ulardek, ovqatim tugab qolayotgandek his etaman. Hozir qirg‘indan qochayotgan yahudiylardan farqim yo‘q — xavotir va halovatsizlik ichimni kemirayotibdi. Tushlarim tugul, o‘ngimda ham shunday behalovatman.
Siz qaysi kitobni o‘qiyapsiz?
199 viewsKamoliddin, 05:14
O
