2023-02-15 08:56:24
O'shanda 5-sinf edim.
Yaqin (shustriy) do'stim bo'lardi.
Bir sinfdosh qizga uni sevib qolganimni hammani oldida chaqib bergan.
Bu hayotimda sevgi mavzusidagi ilk messeyj edi. Ko'zimga yosh kelgan o'sha payt. Hozirgacha sababini bilmayman.
Orada kim bilan qanday munosabat bo'lgan hech birini eslolmasligim mumkin, ammo o'sha voqea sekundigacha yodimda. Qizni yonimga kelib, "Sen nega yig'layapsan, jinni. Men yig'lashim kerak" degan gapi ham.
Hozir eslab kulaman. Xulosalarim:
— Sevgi bor.
— Sevish xato emas.
— Sevib, sevilib yashash kerak.
Bizning jamiyatda ta'bu mavzu sifatida ko'riladigan sevgi haqida yaxshi post o'qib qoldim. Quyida taqdim etaman.
O'zbekistonda sevgi yo‘qmi?Mengacha ham, sizgacha ham, birinchi, ikkinchi, uchinchi Renessansgacha, Zahiriddin Muhammad Bobur tug‘ilishidan oldin ham, hozirgi O‘zbekiston hududida turli sulolalar hukmronlik qilgungacha va hatto ilk odam izlari dunyoni kezib yurganda ham sevgi-muhabbat bo‘lgan.
O‘zbekistonda turli-tuman bayramlar, sanalar ko‘pdan ko‘p, lekin sevgiga kelganda, birdan odobli bo‘lib qolamiz, o‘zimizdan uyalamiz, kimdir sevsa, uning hislarini o‘yin qilamiz yoki ustidan kulamiz. Marketing yoki reklamada shu mavzudan foydalansa, qanaqadir nomi uzundan-uzoq, tushunarsiz funksiyali idoralardan xatlar keladi. Sevgi mavzusi "MA'QULLANMAGAN" bilan muhrlanadi. Shu odamlarning qalblariyam umrbod muhrlanganmikan, deb o‘ylab ham qolasan…
Yuqoridan tushgan tarbiya agendasi oddiy odamlarning hayotidan sevgidek muqaddas narsani o‘chirib yuborolmasligini esa hammamiz bilamiz.
Butun boshli 35 millionlik aholili davlatda sevgi – xuddi taqiqlangan tushunchadek, o‘qish joyingizdanoq ta'qib boshlanadi, bog‘ tomon qochasiz – yana ta’qib, uyingizga kirasiz – ta'qib. Minbarlardan ta'qib, semiz-semiz sovuqyuz "ma'naviyatparvar" amaldorlardan ta'qib. Haypga o‘ch yutubchilardan ta'qib. Shuncha ta'qib bilan hissiyotlari endi shakllanayotgan yoshlarni payshanba mavzusidan tikka Google qidiruvlari tomon sargardon qilib yuborishadi.
Hurkakkina yoshlarning shaxsiy hayoti, hislariga zargar kabi yondashilmaydi, to‘g‘ridan-to‘g‘ri buldozer bilan kirib boriladi.
O‘zbekistonda sevgi yo‘qligidan ham hamma bir-biriga o‘qrayadi, hamma bir-biridan alamzada, hayotda mazmun yo‘q, romantiklar bu yurtda shoir bo‘ladi yoki piyonista, yoki bittada combo – har ikkisi bo‘pketadi. Davom ettirmadim.
Sevgi haqida ruboiylar, g‘azallar yozgan ajdodlar, biz ular bilan faxrlanadigan ajdodlar zamonida muhabbat or hisoblanmagani aniq. Biz o‘zgarganmiz, biz o‘zimizcha obrazlar yaratib olganmiz. Hech kim ko‘rmaganda, qanaqamiz?
Gapning qisqasi, O‘zbekistonda sevgi taqiqlanmagan. Mantiqsiz, darchali qonunlar, kimyoviy xossasi o‘zgartirib tashlangan, chirigan, kimdir bizga majburan kiydirgan juldur choponlar va sizning turmushingizga tikilgan, ma'nan g‘ilay ko‘zlar bor, xolos.
O‘zbekistonda sevgi taqiqlanmagan. Seving. Izhor qiling. Hayot shu. (c)
46 views05:56