2022-07-15 19:38:06
Болаликда толиқиб, ҳориб тоғларга мингашган қирлардан қишлоқ томон энар эканмиз ҳеч қадамимиз унмас, 10-15 чақирим наридаги том жуда олис кўринар, шафқатсиз йўл бизни иссиқ қовурма совиётган уйгача ҳали кўп азоблашини ўйлаб эзилар, умидсизланардик. Шунда яккам-дуккам жойларда битиб қолган тоғ олчаси, арча, ёввойи жийда, олма ва бошқа турли қирга холдек ўсган дарахтлар бизга мадад ва маёқ бўларди, яъниким уни қўл етар мўлжал қилиб олардик-да: “Шунгача бор, кейин дам оласан, шу арчага етсам мириқиб сув ичаман, шу “қора”га борсам марра меники” дея ўзимизга-ўзимиз пичирлаб одимлар ва ўша мўлжаллар ортидан олис йўл яқин бўлар, адашиш кам, дилимиз чоғ бўларди.
Бу матонатли дарахтлар илдизи бир тотим сув ичмоқ учун – виждон билан тирик қолмоқ учун бизнинг йўлдан кўра узоқ ва азобли “жўл” босгани аниқ . Улар тоғнинг аччиқ шамолига ҳам, қирнинг оловига ҳам, қишнинг бўронига, ёзнинг саратонига ҳам чидаб тик қолган, тик кўкка бўй чўзган, баҳорда гуллаб, ёзда мевалар, кузда хазонлар сочган кам сонли дарахт - қўналғалардир.
Гоҳида қияликдан шитоб билан тушиб келар экансиз, ўзингизни тўхтатиб олиш учун ҳам энг биринчи шу дарахт шохларини тутасиз, эриниб тўхтаб қолсангиз шамолда тебраниб турган шохлар сизга “тур” деб, “юр” деб имлаган бўлади.
Мен ўзбек миллатининг илмли, маърифатли, тўғри сўзни ҳар доим, ҳар қандай ўринда айта оладиган, қўлидан ўрнак бўларли иш келган, бир ишни қойиллатган, халққа мушт эмас, йилка тутган, келажакни бугундан кўпроқ ўйлайдиган, ўз касбининг устаси, журъатли шахсларини худди шу таянч дарахтларга ўхшатаман. Улар миллат болалари учун бир мўлжалдир, етиши ва ўтиши керак бўлган мўлжал, умидсизликдан, чарчоқ ва азоблардан ҳоли тутиб қолишга ва катта йўл учун қалқон бўлишга қодир зиёли шахслар – миллат истеҳкомларидир. Шу қўрғонлар билан миллат миллат бўлади ва омон қолади. Шулардан бирини мен шубҳасиз Карим Баҳриев тимсолида кўраман.
Карим Баҳриев номи азиз Ватанимиз ҳуррияти ҳақида гап кетганда ҳам, журналистикамизнинг яқин тарихи ва бугуни ҳақида баҳс туғилганда ҳам, адабиёт, шеър дейилганда ҳам дадил айтиладиган қаҳрамонлардандир. Уларнинг қадрига бугун етишимиз шарт эмасми?
Карим ака олтмиш ёшга етди. Қувончли кун, шукуҳли кун, Алишер Навоий номидаги Давлат Адабиёт музейи раҳбарияти ва жамоаси номидан устозни йўқладик, камтарона қутладик, лекин миллат фидойилари тириклигида музейларда ва музейлардангина эмас, давр ва давраларнинг тўрида эъзозланмоғи керак эмасми?! Шу миллат ғурури эмасми?
Карим ака бир шеърида:
“Ҳар тулки қошида турланганим йўқ, Этим қолмаса ҳам, юзим қоладир” дея ҳитоб этган эди, барчамиздан шу юзимиз қолсин, икки эмас, тусланмаган, мансаб-у пул тилмаган, нафс тиртиғ ясамаган, ҳирс ўймаган, заиф-у мазлумлар туфламаган, катта тавоқларга эгилиб қавармаган, иймондан ёруғ бир ЮЗ қолсин!
Илоҳим!
Карим ака, ҳали бизга кўп йиллар таянч бўлиб турмоғингиз шартдур!
Ҳурмат ила,
Жавлон Жовлиев
@javlonjovliyev
854 views16:38