2022-06-29 20:57:14
Partizancha marketing haqida eshitganmisiz?
Hozir har qadamda undan foydalaniladi, lekin hamma ham uni payqayvermaydi. Agar sizga qiziq boʻlsa, oʻqishda davom eting.
Partizan marketingi (inglizchada asosan "guerilla marketing" deb yuritiladi) uning asosiy prinsipi kam investitsiya bilan yoki umuman ortiqcha byudjet sarflamasdan natijaga erishishdir. Uni oddiy qilib, "kam byudjetli tezkor marketing" deyish mumkin.
"Partizan marketing" tushunchasi amerikalik reklama mutaxassisi Jey Konrad Levinson tomonidan qoʻllangan. Levinson tashrif qogʻozlar, bukletlar, otkritkalar, taklifnomalardan reklama maqsadida foydalanishni taklif qilgan. Hozirgi kunda esa, reklamaning bunday "arzon va sezilmas" vositalari roʻyxati ancha kengayib bormoqda.
Qiziq tarafi, mohirona qoʻllangan partizan marketing vositalarini raqobatchilaringiz payqay olmaydi. Ammo, u aynan potensial xaridorlarga juda tez taʼsir qiladi. Chunki, partizan marketingi mijozlarga oʻz ehtiyojlarini anglatish va xarid uchun motivatsiya berishga moʻljallangan. Potensial mijozlar oʻzlarini kimningdir bosimi yoki taʼsiri ostida qaror qilayotgandek his qilmasligi lozim.
Oddiy misol — bozordagi somsa sotuvchilari. Ular kerakli paytda kerakli auditoriyani topib borishadi. Shu sababli ham koʻpincha xaridorlar shu sotuvchilarni koʻrgandan keyin ochlikni his qila boshlashadi. Ularga ortiqcha reklama ham, hattoki maxsus doʻkon ham kerak boʻlmaydi)
Bundan tashqari, partizan marketingning virusli marketing, ambient, fusion va life placement kabi yoʻnalishlari mavjud. Ularning har biri biznes ehtiyoji va maqsadiga qarab, maʼlum kanallar orqali olgʻa suriladi. Muhimi, bu kanallar odatiy marketingdan farqli oʻlaroq, koʻzga tashlanmaydigan boʻlishi kerak.
Buning uchun quyidagi kanallardan foydalanish mumkin:
— Ijtimoiy tarmoqlar (ayniqsa virusli reklamalar uchun);
— Tematik forumlar (maʼlum guruhlarda mahsulot yoki xizmat haqida "otziv" yoki fikr qoldirish);
— OAV yoki media olamidagi insonlarning bloglari (barter sifatida mahsulotni bepulga sinab koʻrish va jarayonni auditoriyaga koʻrsatish);
— Videomarketing, YouTube orqali targʻibot (mahsulotingiz haqida qiziqarli va foydali maʼlumotlar berib borish).
Siz kundalik hayotda partizan marketingi qoʻllangan holatlarni koʻrganmisiz? Yana qaysi marketing usullari haqida bilishni istaysiz? Izohlarda yozib qoldiring.
Maʼlumot foydali boʻlgan boʻlsa, boshqalarga ham ulashishni unutmang)
168 views17:57