Jo'rabek JAHON

2020-11-12 09:30:14 КУТУБХОНА – НУРХОНА

Алишер Навоий номидаги
Ўзбекистон Миллий кутубхонасининг
150 йиллигига

Ҳазрат Навоийнинг номлари сизда,
Улуғ китобларнинг томлари сизда,
Машрабнинг, Румийнинг жомлари сизда,
Кутубхоналарнинг қутлуғ онаси –
Ўзбекистон Миллий кутубхонаси.

Бобур ҳам шу ерда, Байрон ҳам шунда,
Кўнгли бутун ёҳуд вайрон ҳам шунда,
Ўз ҳолига ўзи ҳайрон ҳам шунда,
Кезар буюкларнинг ўтли нафаси,
Ўзбекистон Миллий кутубхонаси.

Эй, зиё масканим – нурхонам менинг,
Устозлар даргоҳи – пирхонам менинг,
Ёлғизим, ягонам, дурдонам менинг,
Дурлар ичинда ҳам гўзал донаси –
Ўзбекистон Миллий кутубхонаси.

Яхши ҳам оламда эзгу хитоб бор,
Зулматни ёритар, китоб – офтоб бор,
Илмга кечикма, ҳозир, шутоб бор,
Аждодлар қолдирган ибратномаси –
Ўзбекистон Миллий кутубхонаси.

Қодирий дардини Фитратга сўйлар,
Авлоний авлодлар ҳақида ўйлар,
Фурқат, Фузулийлар, Чўлпон, Лутфийлар,
Муқимийнинг муқим жойи, хонаси –
Ўзбекистон Миллий кутубхонаси.

Фазодан қаралса Ер ҳам нуқтадир,
Умримиз ўтмоқда, ёш кетмоқдадир,
Бир кун Олий Ҳакам барин тўхтатир,
Шунгача илм изланг Одам боласи,
Ўзбекистон Миллий кутубхонаси.

Бу ерда низо йўқ бағрикенглик зўр,
Диний, ирқий бирлик, софлик, тенглик зўр,
Келиб ўзинг ҳис эт, бориб ўзинг кўр,
Маърифат мулкининг зўр кошонаси –
Ўзбекистон Миллий кутубхонаси.

Қанча ўксик қалбга бўлгансан малҳам,
Хаста юракка ҳам, кемтик дилга ҳам,
Бир юз эллик йил бу – қанча куч, чидам,
Муборак юз эллик ёш остонаси,
Ўзбекистон Миллий кутубхонаси.

Дунё тургунича огоҳ, хушёр бўл,
Маърифат аҳлининг бахтига бор бўл,
Олам карвонига ўзинг сардор бўл,
Миллат келажагин қутубхонаси –
Ўзбекистон Миллий кутубхонаси.

Жўрабек ЖАҲОН

Telegram | Facebook | Instagram Ochish/sharhlash

2020-10-14 13:10:54 ​​Ифтихор

ЭЛДОР

Ватандошимиз, машҳур футболчи
Элдор Шомуродовга

Бир қат ўсди руҳи ҳар жоннинг,
Элнинг ори бўйнингда, Элдор.
Кўрсатиб қўй,
Ўзбекистоннинг
Сенинг каби ўғлонлари бор!

Бизлар шундай боймиз зиёга,
Айтсин, агар кам бўлсак кимдан.
Жарқўрғондан чиқиб, дунёга
Ўзбекман деб жар солгин Римдан!

Тотиб кўрсин зарбинг кучини,
Титраб кетсин тунмидир, тонгдир.
Ҳар бир голинг ўша миллатга –
Миллатингдан чалинган бонгдир.

Ер айланар неча карралар,
Озодликка талпингай ҳар қуш.
Сен эришган ютуқ, марралар,
Миржалоллар кўролмаган туш.

Месси билан ўйнайсан ҳар дам,
Роналдуга берарсан ҳам чап.
Ман-ман деган футболчилар ҳам
Эрматовдан эшитган-ку гап.

Ҳеч бўлмасин халқнинг кўзи нам,
Элдор исми асли сардордир.
Мен билмадим, балким, сенинг ҳам,
Пеледан бир аламинг бордир.

Ҳаёт ўхшаб кетар футболга,
Гоҳи мағлуб, гоҳида ғолиб.
Кимдир бориб юрибди фолга,
Ўзининг зўр имкони қолиб.

Йигитлар бор – иғвога банди,
Майда гапни юк деб кўтаргай.
Юрт кўтаргай асл фарзандни,
Чин фарзанд ҳам Юртни кўтаргай.

Олам ўпган этак, қўлларин,
Бизда шундай улуғ зотлар бор.
Аждодларинг руҳи қўлласин,
Парвардигор Ўзи бўлсин ёр.

Мен футболчи эмасман, бироқ,
Қоғоз узра қалам сургайман.
Парвоз қилсанг қанча кўп йироқ,
Шеърим билан тиргак бўлгайман.

Жўрабек ЖАҲОН,
Ўзбекистон Ёзувчилар уюшмаси аъзоси, шоир

Аъзо бўлинг:
https://t.me/joinchat/AAAAAFR5VfSQjPeC7ODZMA
https://t.me/joinchat/AAAAAFi6S36Eciyxe9lKJw Ochish/sharhlash

2020-08-04 18:34:25 НУРЛИ МАНЗИЛЛАР

Муса оға Эрниёзов хотирасига

Меҳрим тошиб бориб Қорақалпоққа,
Устюрт кенгликлари узра кезгандим.
Дашт-у далаларин босиб қучоққа,
Ўзимни қанчалар бахтли сезгандим.

Оролга термулиб ўй сурдим узоқ,
Салом келтиргандим унга Каспийдан.
Бу халқнинг бунчалар кўнгиллари оқ,
Дангал ва самимий, холи расмийдан.

Қардошим, жондошим, эй оғам, иним,
Яхши-ёмонингда ёнингда жаммиз.
Байрам бўлаверсин юртда бетиним,
Қанийди одамзод яшаса ғамсиз.

Ажойиб ўлка бу, таъриф беқиёс,
Жаннатмонанд диёр деса бўлади.
Ҳар икки ўғилнинг бири Эрниёз,
Бирисининг исми Муса бўлади.

Суюкли элларни синагай Оллоҳ,
Севикли бандасин йўллар сабрга.
Бирга эришгаймиз ҳушёр ва огоҳ,
Нурли манзилларга етгаймиз бирга.

Қалбимда туғёнлар ураётир жўш,
Тошган сатрларин кўчирдим оққа.
Худо умрларга кўпроқ умр қўш,
Сабр бер ўзбек ва қорақалпоққа.

Жўрабек Жаҳон,
Ўзбекистон Ёзувчилар уюшмаси аъзоси, шоир Ochish/sharhlash

2020-07-31 06:54:25 Ассалому алайкум.
Қурбон ҳайити муборак бўлсин!

Тинчлик-хотиржамлик, файзу барака, бахт ва қувонч, фаровонлик ва саломатлик ҳеч қачон тарк этмасин!

Telegram | Facebook | Instagram Ochish/sharhlash

2020-07-19 15:01:00 Студия 24 | Жўрабек Жаҳон - Ўзбекистон Ёзувчилар уюшмасми аъзоси, шоир билан суҳбат
#uzbekiston24

mtrk.uz | Youtube | Facebook | Telegram Ochish/sharhlash

2020-06-08 05:19:03 #iqtidor

"101 Ўзбек жангчиси"

Жўрабек Жаҳон
Улуғбек Мусинов

Telegram | Facebook | Instagram Ochish/sharhlash

2020-05-23 10:22:39 АДИБЛАР ХИЁБОНИ

Навоийнинг баёти — жисму жоним, нафасим,
Байтларини ёд айтсам, яйрар кўкрак қафасим,
Ўқирканман ортадир шу чаманга ҳавасим,
Адабиёт қутқаргай жаҳолатдан дунёни,
Нур ва зиё маскани Адиблар хиёбони.

Айтадирлар дунёда тоғлардан ҳам сўз оғир,
Қараб бўлмас, қалб бўлса, битта мунгли кўз оғир,
Маърифатдан холидир сенга ундай дўст оғир,
Адабиёт кўнгилга сингдиргай нур-зиёни,
Нур ва зиё маскани Адиблар хиёбони.

Ватандан дарс бергувчи бизда Бобур бобо бор,
Ёруғ маслак мужассам, кўп эзгу муддао бор,
Бошқаларни билмадим, бизда шундай дуо бор:
“Ўзинг асра, соғ бўлсин элнинг яхши-ёмони”,
Нур ва зиё маскани Адиблар хиёбони.

Фурқат ўтди фироқда, ўз юртидан йироқда,
Юртлар борки халқлари яшар қўрқув, титроқда,
Кўксимни бир ифтихор тўлдирмоқда шу чоғда,
Ерни бағримга босиб, қучгим келар самони,
Нур ва зиё маскани Адиблар хиёбони.

Бизга буюк ибратдир, улуғ мактаб, кетмас онг,
Бердақ, Беҳбудий, Чўлпон огоҳликдан урар бонг,
Огаҳий ғазалидай отаётир тиниқ тонг,
Табаррук, улуғ даргоҳ Адабиёт бўстони,
Нур ва зиё маскани Адиблар хиёбони.

Қодирий, Авлонийни зиёрат қилдим бориб,
Чорлар Эркин Воҳидов, устоз Абдулла Ориф,
Барчаси дорилфунун, ҳар бири бир маориф,
Ижод мактабларининг ортар шуҳрати-шони,
Нур ва зиё маскани Адиблар хиёбони.

“Подшоларнинг сўзлари — сўзларнинг подшосидир”,
Юрт ғамхўри қурдирган мукаммал иншосидир,
Муҳташам, олиймақом биноларнинг бошидир,
Дунё ҳайрат ичра лол, сўз асрагай жаҳонни,
Нур ва зиё маскани Адиблар хиёбони.

Қанча китоб ўқисанг, шунча билиминг бойир,
Ёниб ўтди кўп адиб, ёниб ўтди кўп шоир,
Улар адабиётга, абадиятга доир,
Худо Ўзинг асрагин онам-Ўзбекистонни!
Нур ва зиё маскани Адиблар хиёбони.

Жўрабек ЖАҲОН

Telegram | Facebook | Instagram Ochish/sharhlash

2020-05-21 13:52:08 САХОВАТПЕШАЛИК

Саховатли инсон Турсунбой акага

Кенг оламга кенг одамлар кенглик қилар,
Ман-ман демас, беклар бунда, тенглик қилар,
Қарич мато топса момом енглик қилар,
Бағрикенглик — ота юртга садоқатдир,
Улашсанг бир парча бўз ҳам саховатдир.

Кекса борки дуо сўраб қўл очади,
Тангри ўзи мард йигитга йўл очади,
Сахий бўлсанг самодан ризқ-мўл сочади,
Инсон кўнглин олмоқ катта маҳоратдир,
Меҳр тўла нигоҳ-кўз ҳам саховатдир.

Дунё кенгдир куч ишлатиб қай маконда,
Кимдир хордир, кимдир зордир қиймаконда,
Ўзин Худо санар гоҳи оддий банда,
Бу дунёда энг ожиз куч - жаҳолатдир,
Табассум қил, ширин сўз ҳам саховатдир.

Осмон бошда, ҳали ер-ку пойимизда,
Учганимиз йўқ, турибмиз жойимизда,
Одам Ато қони бордир лойимизда,
Эзгулик бу – сўзимизда нақоратдир,
Элга берсанг ризқу-рўз ҳам саховатдир.

Саховат не, саховат бу - имон асли,
Меҳр-шафқат, муҳаббат ва ислом асли,
Бухорийлар, Термизийлар, Темур насли
Юртга фидо бўлинг, дунё омонатдир,
Оқил бўлсанг кам-у кўст ҳам саховатдир.

Ўзбек бўлса, у чумчуқнинг инин бузмас,
Гиёҳ топтаб, чумолининг кунин бузмас,
Мусулмоннинг, насронийнинг тунин бузмас,
Бузса гар у, бу миллатга хақоратдир,
Асил бўлса яхши дўст ҳам саховатдир.

Ғурурим шу: Отам ўзбек, онам ўзбек,
Жондан азиз кўрганим ҳамхонам ўзбек,
Болам ўзбек, боқсам бутун олам ўзбек,
Меҳрсизлик халқлар учун қабоҳатдир,
“Ўзбек” деган сўзнинг ўзи саховатдир.

Жўрабек Жаҳон

Telegram | Facebook | Instagram Ochish/sharhlash

2020-05-08 11:55:19 Telegram | Facebook | Instagram Ochish/sharhlash

2020-05-07 06:11:09 ЭРИНЧОҚ БОЛА

Укам Суҳробга

Фанлар турли-туман экан,
Ўйлайман ким бўлсам экан,
Шоирми ё шафёрми ё,
Қани тез улғайсам экан.

Ана мактаб, яна мактаб,
Опам борар хурсанд, сакраб,
Онам ана кўрдингми дер,
Келсалар мактабни мақтаб.

Эрта туриш бунча азоб,
Оламда йўқ унча азоб,
Қандай яхши уйга қайтиш,
Мактабга боргунча азоб.

Олдин боғча дер эдилар,
Ёдлаб юргин шеър дедилар,
Думалоқ коптокни ушлаб,
Билсангиз шу Ер дедилар.

Бошим қотар ўйлар сурсам,
Қани ҳар кун ўйнаб юрсам,
Икки олиш бунча осон,
Бешга кўзим тикиб турсам.

Билдим, қаттиқ ўқиш керак,
Ўрганишу уқиш керак,
Олим бўлиб бу оламни,
Асраш ҳам қутқариш керак.

Жўрабек Жаҳон

Telegram | Facebook | Instagram Ochish/sharhlash