2021-01-09 10:40:37
Imom Buxoriyning nidosi
Tugab adogʻiga yetdi darmonim,
Zoʻrgʻa jon saqlayur xalqumda jonim,
Men uchun yeringda joy ham qolmadi,
Meni huzuringga chorla, Rahmonim!
Madinang tomonga burildi yoʻlim,
Faqat hadis yozdi bu ikki qoʻlim.
Aslo niyatimda yoʻq edi oʻlim,
Meni huzuringga chorla, Rahmonim!
Insonman, qalbimda ozgina alam,
Amir huzuriga chorlagan ul dam
Yana ushlolmadim tilimni mahkam,
Meni huzuringga chorla, Rahmonim!
Ajib dindorlaring koʻrdim ming talash,
Ishlari - goʻriga tinmay oʻt qalash,
Bu kaslar ichida hayf erur yashash,
Meni huzuringga chorla, Rahmonim!
Rasul hadisiga ketib ming xayol,
Qalbimga kirmabdi bir zoti ayol,
Shuncha mehnatlarim topmayin zavol,
Meni huzuringga chorla, Rahmonim!
Tiriklar har kuni yoqamdan tutar,
Koʻnglimdan har kecha hasrat, dard oʻtar,
Rivoyatda kelgan asʼhoblar kutar,
Meni huzuringga chorla, Rahmonim!
Dunyoga yarashar kuy-qoʻshiq, baxshi,
Ehtimol ularga foniy ishq yaxshi,
Taxirlab bormoqda hayotning magʻzi,
Meni huzuringga chorla, Rahmonim!
Yetar, sen tomonga yurgim kelyapti,
Otamning yonida turgim kelyapti,
Abu Hurayrani koʻrgim kelyapti,
Meni huzuringga chorla, Rahmonim!
Oltmish uchga kirdim, ortigʻi mushkul,
Oʻngimni qoplayur vaxshiy bir dovul,
Har kuni tushimni band etdi Rasul,
Meni huzuringga chorla, Rahmonim!
27 views07:40