2022-06-19 13:29:01
OQIBATSIZ JIGARDAN KO‘RA...(Hayotiy hikoya)
Uning boshiga ish tushdi. Xotini og‘ir dardga chalinib, katta qarzga botdi. Lekin dard shu bilan chekinmadi. Oldinda yana kimyo muolajalari turardi. Olayotgan maoshi ro‘zg‘orni tebratishga zo‘rg‘a yetadi, bu yoqda dori-darmon deganday...
Hayotda shunday vaziyatlar bo‘lar ekanki, nima qilishingni, qay devorga boshingni urishingni bilmas ekansan. Go‘yoki butun dunyo sendan yuz o‘girganday...
U xotinining ertaga bo‘ladigan muolajasiga qayerdan pul topishni o‘ylayverib, boshi og‘rib ketdi... Nima qilsin, kimdan yana qarz so‘rasin? Avvalgi qarzdorlar eshigiga qarzni so‘rab kela boshlashdi. Bu yerda esa... U ilojsizlikdan “dod” deb baqirgisi kelardi-yu, yanayam o‘zini tutib turardi. O‘ylab-o‘ylab oxiri badavlat qarindoshi – amakisining o‘g‘lidan yordam so‘rashga ahd qildi.
Amakivachchasi hammaga yordam beradi, lekin uning bir yomon odati bor edi. Pul berishdan avval qarz oluvchini obdon yerga uradi, dunyodagi eng haqoratli so‘zlar bilan kamsitadi, mazax qilib kuladi, xullas ustidan mag‘zavani ag‘darib, loylarga botirib, hammaga ovoza qilib, keyin pul beradi. Lekin u hozirda noiloj edi...
U yo‘lda ketayotib yonidan o‘tib ketgan mashinaning to‘xtab, orqaga yurayotganini ko‘rdi. “Judayam haybatli mashina-da Land kruzer”. Shu payt mashina oldida to‘xtadi va uning rulida akasi o‘tirgan ekan. Akasi uni uyiga olib ketdi, yo‘l-yo‘lakay o‘zining yutuqlari haqida gapirib ketdi. Uch qavatli uylar bilan o‘ralgan katta hovlisida qurilishni tugatganini, “falon” pulga “Land kruzer” olganini, kelasi hafta oilasi bilan dam olgani 10 kunga chet el sayohatiga ketayotganini, ertaga novvos so‘yib, xudoyi qilayotganini maqtanib gapirib berdi. Shundan keyingina ukasidan hol-ahvol so‘radi.
Ukasi oilaviy sharoiti, ro‘zg‘orni zo‘rg‘a tebratayotgani, xotini og‘ir kasalligi, ertaga ertalabka kimyoviy muolaja uchun pul kerakligi, shuning uchun amakisining o‘g‘lidan pul so‘ragani ketayotganligi haqida gapirib berdi.
- E, uka, nima qilasan ulardan pul so‘rab? Ezvoradilarku ustingdan kulaverib... Bir gap bo‘lar, yur undan ko‘ra qurgan uylarimni tomosha qil, keyin ovqatlanamiz...
Shu kuni akasi uni kechgacha uyida olib o‘tirdi. Ukasi ham noilojlikdan pul ilinjida chidab o‘tirdi. Lekin xayrlashar chog‘i akasi pul haqida og‘iz ochmagach, sekin o‘zi so‘radi.
- Uka, hali aytdimku, kelasi hafta 10 kunga oilaviy chet elga dam olgani ketayotibmiz. O‘zi 10000 dollar nima bo‘ladi, hech narsaga yetmaydiku, deb kimdandir qarz olmoqchi bo‘lib turibman. Buning ustiga jiyaningga “o‘qishga kirsang “Malibu” olib beraman”, - deb lavz qilganman, u ham o‘qishga kirdi, endi va’dani bajarishim kerak. O‘zi bilasanku, sani judayam yaxshi ko‘raman, jiyanlarim ham zo‘r, kelinga gap yo‘q. Sandaka mehribon uka hech kimda yo‘q. Lekin o‘zimga ham yetmayapti, agar pulim bo‘lganida jonim bilan bergan bo‘lardim...
U akasining oldidan bo‘shashib chiqdi. Shuncha olib o‘tirib, kunni tun qilib, eng asosiysi yo‘ldan qoldirib, pul bermay jo‘natayapti... Axir ertaga ertalabga xotinining kimyo muolajalari uchun pul judayam zarurku. U shu o‘y-hayollar bilan kech bo‘lsa ham amakivachchasining uyi tomon yo‘l oldi...
“Mayli pul berishdan avval obdon yerga ursalar ham, dunyodagi eng haqoratli so‘zlar bilan kamsitsalar ham, mazax qilib kulsalar ham, xullas ustimdan mag‘zavani ag‘darib, loylarga botirib, hammaga ovoza qilsalar ham, baribir shundan keyin pul beradilarku. Oilam tuzalib ketsa bo‘ldi. Hammasiga chidayman. Akamga o‘xshab boyligi bilan maqtanib, pul bermagandan ko‘ra, yerga urib bo‘lsa ham pul bersa bo‘lgani...
U amakivachchasining uyiga yetib keldi va darvoza qo‘ng‘irog‘ining tugmasini bosdi... Darvozani amakivachchasining o‘zi ochdi. U yig‘lab yuborishdan zo‘rg‘a o‘zini tiyib, bor gapni aytdi-qo‘ydi. Eng qizig‘i, amakivachchasini bir og‘iz so‘z ham demadi. Indamay ichkariga kirib, keragidan ortiqcha pul olib chiqdi va “Qachon va qancha pul kerak bo‘lsa uyalmasdan kelaver, jiyan” deya pulni qo‘liga tutqazdi...
BEHZOD HOJIMATOV
@Islomiy_Statuslarii
11.9K views𝓖𝓸𝓵𝓭 𝓪𝓭𝓶𝓲𝓷, 10:29