2023-03-12 16:36:52
PAYGʻAMBARNING QABRIGA OYOQ UZATILADIMI?Bugun sizlarga “Makka Ummul Qur’on” universitetida tarix fanidan doktori boʻlgan va 30 yildan beri Makkada yashayotgan Najotiy Oʻzturk beydan eshitgan bir voqeani aytib bermoqchiman.
Najotiy bey bugungi kunda Makka shahridagi bir xususiy kutubxonada boshqaruvchisi. U Madinai munavvarada Paygʻambarimiz sollallohu alayhi vasallamning masjidlari yonida boʻlgan voqeani shundau hikoya qildi:
“Najotiy bey Paygʻambar afandimizning masjidida namoz oʻqib chiqsa, terakning ostida oyogʻini toʻgʻri Rasulullohning qabrlariga uzatib, uxlayotgan kishini koʻrib qolibdi. Koʻrinishidan arab ekan. Najotiy bey “Butun dunyoda insonlar Kabaga oyogʻini uzatmaydi-yu, bu kelib Rasululloh sollallohu alayhi vasallamning masjidida ularning qabriga oyoq uzatib yotibdi”, - deb koʻnglidan oʻtkazibdi. Keyin yoʻlida davom etsa, orqasidan bir kishi yelkasiga qoʻlini qoʻyib: “Seni shu daraxt tagidagi kishi chaqirdi, eshitmadingmi?”-debdi.
Hayratlangan Najotiy bey darhol u kishining yoniga borib, “Meni chaqiribsiz…” - desa, u kishi: “Sen, mening qanday oʻtirishimga nega aralashyapsan, inson doʻsti va qoʻshnisining qarshisida bamaylixotir oʻtira olmaydimi?
Doʻstim uchun bu muammo boʻlmasa, seni nima huzursiz qildi? Ikki yaqin doʻstning orasiga nega kirasan?”-debdi.
Najotiy bey darrov tiz choʻkib, uzr soʻrabdi va u badaviy bilan uzoq suhbat qurgan ekan.
Yana deydiku, Rasululloh sollallohu alayhi vasallamning masjidida Qur’on oʻqib oʻtirgan edim. Yonimga bir kishi kelib oʻtirdi. Javondan Qur’on kitobini olib yerga qoʻyib oʻqiy boshladi. Ma’lumki, bizda Qur’onni beldan pastda tutmaslik odatimiz bor. Odam Oʻrta Sharqdan kelganga oʻxshardi. Qur’onni yerga qoʻyganini koʻrib bezovta boʻldim. Ogohlantirmoqchi boʻldimu, Qur’on oʻqishini buzmay deb ikkilanib turgan edim, u qichqirib yigʻlashga tushdi. Oʻz-oʻzimni savolga tutdim. Sen Qur’onga hurmatlimisan yoki umi?!
Qur’onga hurmat - yerga qoʻymaslikmi yoki qalbga naqsh qilishlikmi? Qur’on oʻqib yigʻlagan va qoʻrqqan hurmatliroq emasmi?
Najotiy beyning soʻramoqchi boʻlganlari:
“Biz shakllarga koʻp e’tibor bermayapmizmi? Mabodo shakllar bilan aldanib qolib, mohiyatni unutmayapmizmi? Nega ikkisini jamlay olmaymiz?
Oyoqlarimizni uzatmasligimiz toʻgʻridir, ammo koʻnglimizni Rasulullohga ne qadar uzatayapmiz?”
“Bolalar jahannamda yonmaydi” kitobidan iqtibos
490 views13:36
I
