2021-06-24 08:29:36
INTERNET TARMOQLARIDA MAʼRIFAT YETKAZISH
@Savollar_kanal 4553-savol
Assalomu alaykum! Men instagram tarmogʻida diniy bir kanal ochmoqchiman. Hozir ham shaxsiy sahifalarimda diniy ibratli videolarni joylab boraman. Agar shunday qilsam kuzatuvchilar soni koʻp boʻlsa mengayam savob yoziladimi? Maqsadim odamlarni yaxshilikka chorlash.
JAVOB:
- Va alaykum assalom!
عَنْ أَبِي مَسْعُودٍ الْبَدْرِيِّ رَضِي اللهُ عَنْهُ أَنَّ رَجُلًا أَتَى النَّبِيَّ صَلَّى اللهُ عَلَيْهِ وَسَلَّمَ يَسْتَحْمِلُهُ فَقَالَ: إِنَّهُ قَدْ أُبْدِعَ بِي، فَقَالَ رَسُولُ اللهِ صَلَّى اللهُ عَلَيْهِ وَسَلَّمَ: اِئْتِ فُلَانًا. فَأَتَاهُ فَحَمَلَهُ، فَقَالَ رَسُولُ اللهِ صَلَّى اللهُ عَلَيْهِ وَسَلَّمَ: مَنْ دَلَّ عَلَى خَيْرٍ فَلَهُ مِثْلُ أَجْرِ فَاعِلِهِ. رَوَاهُ الْأَرْبَعَةُ
Abu Masʼud al-Badriy roziyallohu anhudan rivoyat qilinadi:
“Nabiy sollallohu alayhi vasallamning huzurlariga bir kishi kelib, (ulovsiz qolganini aytib), ulov soʻradi. Rasululloh sollallohu alayhi vasallam: «Falonchining oldiga bor”, dedilar.
Bas, uning oldiga bordi va u ulov berdi. Shunda Rasululloh sollallohu alayhi vasallam:
“Kim bir yaxshilikka dalolat qilsa, unga qiluvchining ajri mislicha (ajr) beriladi”, dedilar».
Toʻrtovlari rivoyat rivoyat qilganlar.
Sharh: Muallif rahmatullohi alayhining ushbu hadisni ilmni yetkazish vojibligi va uning fazli haqidagi bobda keltirishlari kishilarga ilmni yetkazish yaxshilikka dalolat ekanligidandir. Yaʼni, bir odam boshqalarga ilm oʻrgatsa, yaxshilikka dalolat qilgan boʻladi. Undan ilm oʻrgangan odamlar qanday amal qilib, savob olsalar, oʻrgatgan ustoz ham ular olgan savob miqdorida savob oladi.
“Nabiy sollallohu alayhi vasallamning huzurlariga bir kishi kelib, (ulovsiz qolganini aytib), ulov soʻradi”.
Paygʻambarimiz sollallohu alayhi vasallamning oʻzlarida unga beradigan ulovlari yoʻq ekan, falonchining oldiga borgin, senga ulov bersa, ajab emas, degan maʼnoda gap aytdilar. Haligi ulov soʻragan odam Rasululloh sollallohu alayhi vasallam zikr qilgan odamga borgan edi, u ulov berdi. Shundan soʻng Rasululloh sollallohu alayhi vasallam:
“Kim bir yaxshilikka dalolat qilsa, unga qiluvchining ajri mislicha (ajr) beriladi”, dedilar.
Bu yerda yaxshilikka dalolat qiluvchi – Paygʻambarimiz sollallohu alayhi vasallam, yaxshilikni qiluvchi – ulov bergan odam. Ulov bergan odam qanchalik ajrga ega boʻlsa, uni ushbu yaxshilikka dalolat qilgan zot – Paygʻambarimiz sollallohu alayhi vasallamga ham shuncha ajr beriladi.
Ehtimol, bizda yaxshilikka dalolat qilish yaxshi ish, degan tushuncha bordir. Ammo ushbu hadisi sharifda bayon qilingan ruh yoʻq. Agar bu hadisdagi ruhdan bir oz boʻlganida edi, ichimizda yaxshilikka dalolat qilmaydigan odam qolmas edi.
Islomning yaxshilik tarafdori ekanligini qarang. Niyat bobida yaxshilikni niyat qilgan odamga uni qilmasidan oldin savob yozilishi aytilgan edi. Bu yerda yaxshilikni niyat qilmasa ham, boshqa kishini yaxshilikka dalolat qilganligi uchun xuddi oʻsha yaxshilikni qiluvchi kabi savob olishi aytilmoqda.
Bu esa siz bilan bizning doimo yaxshilikka daʼvat qiluvchilardan boʻlishimizni taqozo qiladi. Qarang, dinsiz, diyonatsiz, iymonsiz odamga kalimai shahodatni oʻrgatib, uni iymonga dalolat qilgan odam qanchalar savobga ega boʻladi?! Bir odam moʻmin-musulmon boʻlib, qancha savob topsa, u ham oʻshancha savobga ega boʻladi! Betavfiq boʻlib, namoz oʻqimay yurgan odamni namozga dalolat qilgan odam oʻsha namozga kirgan odam umr boʻyi namoz oʻqib, qancha savob olsa, shuncha savobga ega boʻlar ekan. Boshqa ibodat va yaxshilik ishlarga dalolat qilishni ham shunga qiyos qilaverish mumkin.
Shuning uchun ilm oʻrganish, oʻzidagi ilmni boshqalarga oʻrgatish oʻta savobli ish hisoblanadi. Bu xayrli ish orqali hech kim erisha olmaydigan ulkan savoblarga erishish mumkin.
412 views05:29